Wier Nicla von Gotes genaden abt ze Goersten und daz gantz covent (sic) daselbz wier verjehen und tu^en chunt, daz uns und unserm gotzhau^es di erber vrau vra^ew Elspet des erwierdigen hern abt Erhartz swester, dem Got genad, geschaft und gegeben hat ledichleich ze unserra gotzha^eus drew weingertel, der ains genant ist daz Hafna^erel gelegen ze Wesendarf und di zwai ligent pei Rossatz, ains haizt daz Prunnel daz ander leit im Niderperg, mit allen den rechten und nutzen und darzue geho^ert also beschaidenleich, daz wier ier darumb und allen gela^eubigen selen all jar jaerleich ein jartag schullen begen an der heiligen junchvra^eu tag sand Juliana mit einer gesungen vigill und mit einer selmess nach unsers gotzhaus arnung und gewanhait. Taet wier des nicht, so schullen sich ier naest erben der vorgeschriben weingertlain hinwider underwinden untz als lang daz wier wider derfullen waz wier versaeumt hieten an dem vorgeschriben jartag. Daruber zu einem urchunt der warhait geben wier den brief bestet und versigelt mit unserm insigel und mit unserm goventz anhangunden insigel, Der brief ist geben nach Christ gebu^erd dreuzenhundert jar darnach in dem siben und sechzigisten jar an sand Gregorij tag.

Source Fulltext: OÖUB 8 (Wien 1883) S. 313, Nr. 319