Wir Nycla von Gots gnaden abbt ze Gersten und der gancz convent desselbigen gotshauzz wier verjehen umb die widern oder di hueb gelegen ze Ravmikch pei dem weg di uns und unserm gotshauzz ledichleich waz vervallen aus Chunrats des Rewssen gewalt und seiner erben, daz wier di selben hueb mit allem dem und durich recht darzue geho^ert mit guetem rat wolbedacht durich erberer la^ewt gepet willen und von besundern genaden haben hinwider verlihen dem vorgenanten Chunrat dem Ra^ewssen zder zeit forster ze Ravmikch Gedrauten seiner hausfrawn und ir paider erben in sogetanermaynung, daz si uns und unserm gotshaus jerleich an unsrer vrowen tag zu der dienstzeit davon schu^ellen dienen und geben drei schilling pfenning wienner mu^enzz. Taeten si das nicht und daran saumig wern, so sind si uns darzue ymmer u^eber viertzehen tag alz lang si uns vertziehent untz drin viertzehen tagen sechczk pfening ze wandel vervallen, und wer auch daz getan daz si uns danne so drei viertzehen tag sich vergiengen und fu^erchaemmen desselben wandels segchs schilling pfening nicht miteinander gaeben und unverczogenleich mitsampt den vorgeschriben drin schilling dienstpfening, so ist allez ier recht daz wir in verlihen haben auf der obgenanten hueb gancz und gar ab und verloren, und ist diselb hueb mit allem dem und darzue geho^eret so vorgeschriben stet wider ledichleich in unser und in unsers gotshauzz gewalt vervallen, und schu^ellen uns der an allen chrieg und an allev irrung underwinden also, daz der oftgenant Chunrat Rewss Gedrawt sein hausfraw und ir paider erben dhain widerred daran nicht haben schullen noch dhainerlay ansprach nicht mer auf di selben hueb haben schu^ellen noch mu^egen weder mit recht noch an recht in dhainen wegen. Wir wellen auch, ob daz geschech daz si di vorgenanten hueb ze Raumikch von irer notdurfft wegen welten oder muesten verchumbern iz wer mit versetzen oder mit verchauffen und des nicht vertziehen mo^echten, so schu^ellen si uns durich der gnaden willen di wir in getan haben von erst und fu^er ander lewt anpieten und vailen ze chauffen. mo^echten oder wolten wier danne von anderr irrung wegen von in nicht chauffen, so mu^egen und schu^ellen si ainem andern gemainen mann der uns darzue gevellt mit unserm willen ir recht daz si habent auf der oftgenanten hueb ze Rawmikch versetzen oder geben ze chauffen in den rechten und pu^enten so hie vor an dem prief stet geschriben. Daruber zu ainem urchůnd der worhait geben wier in den prief mit unsern paiden anhangunden insigeln bestetigt und versigelt. Der prief ist geben nach Christs pu^erd u^eber dreutzehen hundert jar darnach in dem syben und sechczkisten jar am mitichen vor unsrer vrowen tag zu der liechtmezz.

Source Fulltext: OÖUB 8 (Wien 1883) S. 307f., Nr. 313