ICH Laurencz der Plesszer mein hawsfraw und unser paider erben wier verjehen, umb unser hof gelegen dacz Streblicz in sand Valteins pfarr darauff Chunrat der Mayr ist gesezzen der unser vreys ledigs aygen ist, daz wier denselben hof mit allen den eren rechten und nu^eczen di darzue durich recht geho^erent haben gegeben ze chawffen unsern lieben frewnten vrowen Annen hern Symonns witiben den Venkken saeligen und junchfrawen Agnesen ier paider tochter und allen ieren erben aus unsrer nucz und gewer in di ier ledichleich umb ain gelt des wier von in gancz und gar gewert sein und verricht in sogetaner maynunge, daz wier desselben hofs schu^ellen ier gewer sein fu^er alle ansprach wo in des durfft geschiecht nach des landes recht in Oesterreich. Taeten wier des nicht, waz si des dann davon schaden nemen den ier aines pei seinen trewn mag gesprechen, denselben schaden allen wie so der genant ist schu^ellen wier in genczleich abtuen und widercheren, und schu^ellen si daz haben auf unsern trewen und auf aller unsrer hab di wier haben. Wier offen auch, ob yemant herfu^er chaem wer der wa^er der pezzer erib wolt sein zu dem obgenanten hof, derselb schol den egeschriben vrowen Annen Agnesen irer tochter und andern iren erben widercheren und geben sibenczk pfunt pfenning wienner mu^ennzz. Und daru^eber zu ainem waren urchu^end der handlung geben wier den prief versigelt mit mein vorgenanten Laurenczen des Plesszer anhangunden insigel und besta^etigt, und sind des zeug durich pezzerr sichherhait willen mit iren anhangunden insigeln di erbern la^ewtt unser o^ehaim Vincencz der Amersperger Go^efrid der Sinczenperger Janns der Steger. Der prief ist gegeben nach Christz gepu^erd u^eber drewczehenhundert jar und darnach in dem zway und sybenczkisten jar an sand Pauls tag vor der liechtmessz.

Source Fulltext: OÖUB 8 (Wien 1883) S. 565, Nr. 566