Ich Hertneid von Losenstain vergich, umb di zu^espru^ech di der ersam geistlich herr abpt Nicla ze Ga^ersten gegen mir hat umb die scheden di im und seinem gotzhaws ze Gersten von mir geschehen sind und widervarn mit prant, daz wir darumb ze paider seitt miteinander vor erbern lewten můtwillichleich getaidingt haben so verre, daz ich derselben scheden aller solt gen hinder in oder er hinder mich. nu hat er sich des von seiner eberchait bedacht daz er derselben scheden hinder mich gegangen ist in so^elher maynung, daz er mir mit meinem gu^etleichem willen und nach rat zu^egeschaft hat die drey erber herren hern Albern von Ottenstain zu der zeit purkgraff ze Steyr hern Jo^ergen von Volkenstorff und hern Fridrich pharrer ze Steyer also beschaidenlich, daz ich nach der selben dreyer herren rat und weisung selb aussprechen sol ze entt, damit dem vorgenanten herren abpt Niclasen und seinem gotzhaws ze Ga^ersten di selben scheden von mir abgelegt werden und gentzlich widergechert, und waz ich sprich daselb sol ich im und seinem gotzhaws ze Gesten steten und gůt machen, es sey mit phanten oder mit phenningen oder mit priefen vor dem prehen tag der nu schirist chu^enftig ist an alle widerred. wer aber daz ich des spru^echs den ich tuen nach rat und beweisung der vorgenanten dreyer herren ausgieng und nicht stet hielt, so pin ich dem oftgenanten herren abpt Niclasen und seinem gotzhaws ze Gesten vervallen fu^enfhundert phunt wienner phenning als er di hat gesprochen pey seiner gewissen ze besteten wellen fu^er sein scheden, und dartzu^e seines gotzhaus vo^egt sower zu der zeit ist sol ich auch vervallen sein fu^enf hundert phunt wiener phening und sol derselb sein vogt im und seinem gotzhaws fu^er diselben fu^enf hundert phunt phening inantwůrtten meiner gu^eter oder meiner hab wie so di genant ist alsvil und im di schiermen mit meinem gu^etleichen willen als lang, untzt das er und sein gotzhaws derselben genanten fu^enf hundert phunt phening gantz und gar dovon becho^emen, daz ich und all mein erben dhain widerred nicht doran haben sullen in dhainn wegen. Mit ůrchund des gegenwu^ertigen priefs der versigelt ist mit meim anhangunden insigel, und sind des zeug mit ieren insigeln mein vetter herr Rudolf von Losenstain und der erber chnecht Hainrich der Chersperger. Geben ze Steyer nach Christs gepu^erd u^eber dreutzehen hundert jar in dem zwai und sibentzigistem jar an sand Lucein tag.

Source Fulltext: OÖUB 8 (Wien 1883) S. 624f., Nr. 622