Wir Niclas von Gots gnaden abbt ze Ga^ersten verjehen, umb die zůespru^echh di wir haben hincz hern Ha^ertneyden von Losenstain von der scheden wegen di er uns und unserm gotshaus mit prannt getan hat, daz wir umb dieselben zuespru^echh und scheden hinder in gegangen sein also beschaidenleich, daz wir im nach rat und auch mit seinem gu^eetlichen willen zuegeschafft haben die drey erber herren hern Albern von Ottenstaiu purcgraf ze Steyer hern Jo^ergen von Folkchensdorf hern Fridrich pfarrer ze Steyr, daz er nach derselben dreyr herren rat und beweisung umb die selben scheden schol sprechhen damit uns und unserm gotshaus abgelegt werd von im und widergechert, und waz er spricht nach derselbigen dreyer herren rat und beweisung denselben spruch wellen und schullen wir im sta^et haben an alle widerred. Ta^eten wir des nicht so schol er von uns und von unserm egenanten gotshaus ze Gersten ledig und los sein gancz und gar aller der scheden di uns von im sind mit pranntt widervaren, und schu^ellen darzue unsers gotshauzz vogt vervallen sein fu^enf hundert pfunt wienner pfening und schu^ellen wir auch hincz dem vorgenanten hern Hertneyden von Losenstain und hincz seinen erben darnach dhainerlay ansprach umb den selben pranntt und schaeden fu^erbaz nicht mer haben in dhainen wegen. mit urchu^end des gegenwůrttigen priefs der bestatt ist mit unserm anhangunden insigel, und des sind zeug mit iren insigeln her Ruedolf von Losenstain und Hainrich der Chersperger. Und ist daz geschehen ze Steyr nach Christs gepu^erd uber dreutzehenhundert jar und in dem zway und sibenczkisten jar an sand Luceyn tag.

Source Fulltext: OÖUB 8 (Wien 1883) S. 623, Nr. 621