ICH Leutolt der Stainrewtter ich Dietmar der Weczel und ich Ulreich der Weczel sein prueder wier verjehen, umb die vier gu^eeter di hernach geschriben stent, aines gelegen an dem Winthag aines auf dem Hochekk pey dem Raday ain blieb auf dem Stainveld pey der Steyer in Stainpekcher pfarr und daz gu^eetel genant an der O^ed gelegen zwischen den wazzern in Garstner pfarr daz alles vreys aygen ist, und darzue ain wisen gelegen pey dem guet an dem Hochekk di lehen ist von dem herczogen, daz unser freunt Perchtolt der Ponhalm dem Got genade, hat lazzen Jannsen seinem sun, daz wier durich notdurfft und no^ettung von gelts schuld wegen hincz den juden diselben genanten vier gu^eeter und wisen wolbedacht nach rat und mit beweisung unsrer negsten und pezsten freunt mit allen den eren rechten und nu^eczen so von alter durich recht dazue geho^ert haben gegeben ze chauffen dem erbern chnecht Symonn dem Eytenperger seiner hausfrawen und seinen erben in ir nucz und gwer ledichleich umb ain gelt des wir von in gancz und gar gewert sein und verricht, damit wier und auch darzue mit anderm gelt haben abgolten und gelo^est von Diernlein der ju^edinn Lesyern des juden witiben ze Steyer, und geledigt von ir und von iren erben die prief all di sew von gelts schuld wegen gehabt habent von unserm vorgenanten freunt Perchtolden dem Ponhalm des egenanten chindes Jansen vater, anders wer daz selb chind Jans gar verdorben und von allem seinem va^eterleichen erib geschaiden. und ist daz geschehen in so^elher maynung, daz daz selb chind Janns und sein erben mitsampt uns und mit unsern erben fu^erbaz auf dieselben vier gueter und wisen dhain ansprach nicht mer haben schu^ellen in dhainen wegen mit fu^erzicht des gegenwu^erttigen priefs, und auch daz wier der selben gu^eeter und wisen schu^ellen ir gewer sein fu^er alle ansprach auf des selben chindes hab Jansens wo in des du^erfft geschiecht nach dem lancz recht. Teten wier des nicht oder war daz getan daz dem obgenanten Symonn Eytenperger und seinen erben ichtes abgieng an der gewerschaft oder an desselben chindes hab Jansens Perchtolts sun mit recht, daz selb schu^ellen si haben auf uns und auf aller unser hab di wier haben wie so di genant ist, und davon becho^emen waz si gesprechen mu^egen pey iren trewen an gever, des si schaden nemen davon daz su^ellen wier in allez ablegen und genczleich widercheren an alle widerred mit unserm gu^eetlichen willen wier sein lembtig oder tod, daz wier und all unser erben dhain widerred nicht dakegen haben schu^ellen in dhainen wegen in der gewerschaft so vor hie stet an dem prief geschriben, den wir vorgenant Leutolt Stainrewtter Dietmar und Ulrich die Weczel geben zu ainem waren urchu^end der handlung versigelt mit unsern anhangunden insigel und bestett, darunder ich mich oftgenanter Janns Ponhalm Perchtolts sun verpint mit meinen trewen an gever stet ze haben alz daz vor hie geschriben stet, und ist des zeug mit seinem insigel unser ohaim Go^etfrid der Sinczenperger, und ist daz geschehen nach Christs gepu^erd u^eber drewczehenhundert jar danach in dem drew und sibenczkisten jar am negsten mentag nach dem sunnbent tag.

Source Fulltext: OÖUB 8 (Wien 1883) S. 652ff., Nr. 653