ICH Andre Sintzendarffer zder zeit ynnhaber hainreichs des pernawer chinder Vnd ich hans pernawer vnd ich Lewtolt pernawer hainreichs des pernawer su^en vnd ich elspet vnd ich Katrei vnd dorothee vnd Katrei (sic) hainreichs des pernawer To^echtter wir veriehen vnd tuen chunt mit veraintem muet nach vnserr pesten frewnt rat mit dem offen prief, daz wir durch vnserr grazzen notturfft willen zder zeit, da wir ez wol getuen machten, ze Chauffen geben haben dem erwirdigen geistleichen herren abpt Niclan ze Gersten vnd seinem gotshaus daselbs daz guet auf der oed in Aschaher pfarr gelegen, daz vnser vreiz aigen gebesen ist, mit aller seiner zuegeho^erung vmb ein gelt, des wir gantz vnd gar von im vnd seinem gotshaus gerichtt vnd gewert sein ze rechtten ta^egen. Wir wellen vnd schu^ellen auch des egenanten guets sein vnd seins gotshaus rechtt gewern sein nach dem Lantz recht ob der enns. wer aber, daz im vnd seinem gotshaus an dem guet vnd gewerschaft icht abgieng mit dem recht, waz er dann vnd sein gotshaus ze gersten des schaden na^emen, den er oder seins Conuents prueder ainer pei seiner gewizzen gesprechen mag, den selben schaden schu^ellen sew haben auf aller der hab, di wir haben, wie di genant ist oder wo di gelegen ist, vnd dauon pecho^emen mit vnserm güetleichen willen an all vnser irrung vnd widerred. Daz daz dem egenanten herren vnd seinem gotshaus ze gersten stet vnd vn- uerchert weleib, darvber gib ich andre Sintzendarffer den prief versiglten mit meinem anhangunden jnsigel vnd zu einer warn getzeunnu^ezz [sic] versiglt mit meins lieben vater Seiboltz des Sintzendarffer anhangunden jnsigel, der mitsampt mir hainreichs des pernawer chind rechtter o^ehaim ist, vnd versiglt mit des erbern go^etfrits des Sintzenperger anhangunden jnsigl, darvnder wir vns verpinten di egenanten chind vnd all vnser erben lemtig vnd chu^enftig, allez daz stet ze haben, daz oben verschriben ist, wann sy ierew jnsigl durch vnserr gepet willen an den prief gehangen habent den egenanten seibolten vnd go^etfriden an schaden. Geben nach christi gepu^erd dreutzehen hundert iar, darnach in dem Na^ewn vnd Sibentzkisten iar An dem heiligen auffarttag.

Source Fulltext: OÖUB 9 (Wien 1906) S. 634-635