Ich Lamprecht Vorster in der Ramsaw die Zeit der Herschafft zu Steir ambtman, Ich Lorentz Vorster Zechmeister, Ich Jörig stampf Auch in der Ramsaw, Ich Conntz Kreutzhueber, Ich Sigmund Wiser, Ich peter aigner fuer vns selbs vnd anstat der gantzen gemein vnd pfarrmenig zu Moln, dafur wir vns auf Iren gegeben beuelch volchomenlichen gemechtigt vnd gewalt angenomen haben, Bekennen aintrechtigklichen vnd vnuerschaidenlichen fuer vns vnd all vnnser nachkoemen Offenlich mit dem briue Allen menschen gegenbuerttigen vnd Kunfftigen, Das allenthalben in der Mueter der heiligen Cristenhait einem Got vnnsern schoepfer vnd erloeser gedint wirdet. Vnd aus Zuflus des heiligen geists vnd schickung des almechtigen gottes als dem heiligisten aller heiligkeit, als dem pesten vnd hoegten gut das er ist, vnd auch von seiner vnbegreifflicher lieb genaden vnd guetat wegen, dardurch er alles menschlich geslecht Erledigt vnd begnad von ewig vnd Ewigkeit versehen hat, Des wir auch nach allem vnnserm vermoegen pillichen danckper sein vnd auf dem Steyerstain genant in der pharr Moln vnd Herschafft Steir In der Ramsaw Ambt moln gelegen, von Newen ain Kirchen angefangen vnd zupawen fuergenomen haben Zu den Eren der allerheiligisten Junckfrauen mueter Marie Irer Haimsuchung vnd ander heiligen. Darauf wir die Erwirdigen Ingotte Herrn Herrn Vlrichen Abbte vnd Conuent vnnser lieben frawengotzhaws zu Garsten ersucht vnd gebeten, vns soelhen willen vnd gunst dartzu zegeben. Also haben sie zu vordrist Got, merung gottes dinsts vnd genad des almechtigen gottes angesehen vnd vns iren gunst vnd willen dartzu gegeben. Hirauf geloben vnd versprechen wir fuer vns vnd all vnser nachkomen mit vnnsern trewen Eren vnd...(?) hiemit wissenlichen vnd vnwiderreflichen in Krafft des briefs, das solcher Ir willen vnd gunst Irem gotshaws garsten Pfarr zu Moln, die dan In vnd Irem gotzhaws Incorporirt ist, allen Iren nachkomen vnd ainem yeden pfarrer zu Moln, gegeburtigen vnd Kunfftigen, an allen pfarrlichen Rechten, Alten herkoemen vnd aller ander sachen vnuergriffen vnd vnschediger sein sollen vnd nemlichen In allen vnd yeden Gotberater(?) was daselbs bey vnd in der obgenantn Kirchen vnd Cappellen gefelt zuestet fleust(?) vnd allenthalben wirdt, das der drittail den oberuenten herrn Abbte Conuent allen Iren nachkoemen vnd gotzhaws Garsten beleiben zusten vnd nachfolgen an vnnser alle vnnser nachkoemen vnd menigklichs vor vnnsern wegen Irrung Hindernuß vnd widersprechen auch all sachen Rechnung vnd anders mit Irem Rat vnd Willen gescheen vnd ausser Ir oder Irer anwald nichts gehandelt werden sol. Das aber solles(?) alles bey wirden vnd krefften beleiben vnd stracks gehalten werden, auch dawider nichts geniessen noch prauchen wellen vnd was wir oder yemandt ander von vnnsern wegen wider das alles aufhueben(?) Kuerzen oder Rechten wolten gaistlich weltlich wie sich das begab oder begebenn moechte, haben wir vnrecht vnd verloren, sie oder wer den briue mit Irem guetem willen Innehat vnd fuerbringt, Recht gehabt vnd gewunnen an aller stat wo der briue fuerkumbt, den wir In vnd Irem gotzhaws Gaersten geben zu ewiger staetigkeit. Mit des wolgebornen herrn herrn Marttn herrn zu Polhaim Buergkgrauer zu Steir ...(?) vnnser genedigen herrn Aigen Angepornen Anhangunden Insigil vnd vnnser vleissigen bete willen besigilt, Im sein genaden vnd erben anschaden. Vnd der sachen zeug mit der Edln Vessten Oswalden Raid seiner genaden Castner daselbs anhangunden Insigil, den wir auch mit vleis darvmben gebeten haben, Im vnd sein erben anschaden. Darunnder wir vns In aller obverschribner maß, dafuer wir vns gemechtigt vnd gewalt geben ist, an sand Tiburtien vnd Valerianien tag Nach Cristi gepurd Vierzehenhundert vnd Im achtunddrewnzigistem Jaren.