In nomine domini amen. Cum dubia fragilis homini sit vita tributa, necesse est, vt quilibet mortalium amicos sibi de rebus faciat transitoriis, per quos in eterna tabernacula, cum defecerit, recipi mereatur. Proinde ego Heinricus filius domini Ortolfi de volchenstorf vniuersis tam futuris quam presentibus fieri cupio manifestum, quod in bona valitudine corporis mei et cum matura deliberatione pariterque de consensu vxoris mee Alheidis et omnium heredum meorum legaui Ecclesie Glvnicensi sed specialiter infirmitorio deputaui predium quoddam, quod wlgariter dicitur avf der Evd soluens VI. solidos denariorum annuatim, de quibus magister infirmorum altari sancti Seruacii in Monasterio nostro (sic) sito cum medio talento denariorum in lampade lucente nocturno tempore prouidebit. De reliquis vero denariis semel in omni ebdomade videlicet in quarta feria predictus infirmarius in altari prefato missam de sancto Seruacio vel per se vel alium procurabit ita tamen, quod Sacerdos ibi missam dicens duos denarios pro sui laboris salario recipiat eo die et eandem missam nullius festiuitatis sollempnitas inpedire debet aliqualiter vel mutare. Insuper fratres predicte Ecclesie Glvnicensis in festo eiusdem sancti Seruacii XII. lectiones habeant et in refectorio consolacionem ab infirmario eodem die recipiant aliqualem. verumtamen cum sciam prefati predii redditus ad hec omnia non sufficere, promitto et obligo me in hiis scriptis, quod talem insufficienciam per additionem aliquorum reddituum aut annuatim per denarios volo libenter refundere et supplere. Hec ipsa ordinatio mea, si per negligenciam non obstante aliquo legitimo inpedimento fuerit pretermissa nec post ternam anmonitionem heredum meorum fuerit emendata, senior de heredibus meis vel proximus consangineus, si liberis caruero, de prescriptis possessionibus tanto tempore se intromittet, donec ea, que neglecta sunt, reuocata fuerint et correcta, facta autem emendatione hic, qui pretextu huiusmodi ordinationis mee de premissis bonis se intromiserat, nichil vlterius habebit disponere cum eisdem, verum si ductus amore prediorum ad restitutionem se difficilem reddiderit eorundem, super rehabitione ipsorum Conuentus aduocati sui auxilium inuocabit. et ne super huiusmodi donatione mea eadem Ecclesia calumpniam ab heredibus meis vel consanguineis meis inposterum paciatur, presentem litteram eisdem tradidi duorum Sigillorum videlicet domini Eynwici prepositi sancti floriani et mei munimine roboratam Testibus annotatis, qui sunt dominus Chvnradus de Capella, dominus Heinricus de Lonstorf, dominus Chvnradus abbas de Seitensteten, dominus Aynwicus prepositus domus sancti floriani, dominus Albertus decanus Lavreacensis, dominus Ditmarus de Tv^ersendorf, dominus Marchardus Sekko, dominus Heinricus Streler, Heinricus Jacober, Hertnidus Chresslinch et alii, qui interfuerunt pariter et audierunt. Acta sunt hec anno domini M°.CCC°.V°. Johannis et Pauli.

Source Fulltext: OÖUB 4 (Wien 1867) S. 489-490, Nr. 524