Reuerendo in Christo Patri et Domino charissimo Domino Gundackero Abbati totique Conuentui in Seitenstetten Englschalcus diuna miseratione Abbas totusque Conuentus Ecclesioe Glunicensis cum orationibus deuotis salutem in eo, qui est omnium vera salus. Vt Virtus charitatis, quae in Regno vitae est praemium defunctorum, in ualle miseriae solatium sit viuorum, mutuis accendi debet exercitijs spiritualium studiorum. Quapropter horum bonorum honorabilium Studium intendentes et societatem irrepraehensibilem, immo sanctam inter vestram et nostram Ecclesias contrahere indissolubiliter cupientes, per quam potissime animarum prospicitur saluti et commodo corporis prouidetur, foedus amicitiae et concordiae spiritualis, quae communi et religioso Fraternitas appellatur, contrahimus et inimus de vnanimi Fratrum nostrorum consilio et consensu et contractum de praesenti hiis conditionibus additis more solito confirmamus, vt Scilicet, quotiens nobis alicuius vestrorum Fratrum fuerit obitus intimatus, proxima feria subsequente compulsatis campanis pro eiusdem animae requie celebretur publice generale officium defunetorum in vigilijs pariter et in Missa et quilibet Sacerdotum tres specialiter dicat missas et inferiores tres quinquagenas, illiterati cum quinquaginta Aue Maria totidem Pater noster, quilibet praemissorum tres insuper corporales suscipiens disciplinas. Praetere singulis annis pro defunetis omnibus Fratribus tam in uestra Ecclesia quam in nostra post Festum Sancti Bartholomaei proxima vacante feria celebretur Sollemniter plenum officium mortuorum publice in Conuentu et quilibet litteratorum addat priuatim placebo. caeteri dicant cum Aue Maria septies Pater noster. Caeterum si quando aliquem nostrum de licentia sui Abbatis ad Monasterium vestrum transire contigerit, Sicut vnus vestrae Congregationis in omnibus, quamdiu licuerit, habeatur. Si vero absque licentia, quod absit, indignationem fugerit Abbatis, tantum vsque ad triginta dies, in quibus pro reformatione talis Fratris tractabitur, quo citius potuerit adimpleri, litteris et nuncijs humaniter colligatur. Verum ne abusus obliuionis tam salutans absorbeat bonum Pacis, has litteras de his factas ratas et gratas habentes in testimonium vobis damus Sigillorum nostrorum munimine roboratas. Scriptum et Datum Anno Dominicas Incarnationis millesimo trecentesimo Decimo Nono, Ad Vincula Sancti Petri.

Source Fulltext: OÖUB 5 (Wien 1868) S. 245-246, Nr. 252