Ich wernhart der woengel Burger tze Steyr vergich offenwar an disem brief vnd tv^en chund allen den, di in sechent lesent oder lesen ho^ernt, daz ich mit wol bedachtem mv^et vnd mit miner havsfrowen Chunegunden gu^etleichem willen vnd tzv der tzeit, da ich ez wol getvn mocht, gegeben han dem Gotzhavz vnd den erbern herren hintz Glevnich in ir Oblay minen weingarten, der gelegen ist am alten Gebling tze Chrems vnd dint sechzich pfennind (sic) in daz spital also beschaidenleich, daz den selben Weingarten di vorgenant mein havsfrowe Chunegund tze einem rechten Leibgeding alain tze irn tagen haben sol also, daz si all iar an sand Mychels tag tzwelif pfenning geb dem Oblayer hintz Glevnich tze einem Cins vnd tzv einem rechten vrchund. Vnd wenne danne di selbe mein havsfrowe Chunegund nicht enist, so sol der vorgenant weingart ledichleich vnd an all widerred oder fvrtzicht aller irre friunt oder erben tzv gehorn dem Gotzhavz tze Glevnich vnd den herren in ir Oblay vnd sullen danne die herren, di tze den tzeiten in dem selben Gotzhavz sind oder her nach chunftich werdent, alle Eritag haben ein Mess mit drin pfenning opfers vnd sulln all iar minen Jartag begen mit vigili vnd Mess also, daz man isleichem herren dez nachtes geb ein semel vnd ein trinchen weins vnd tzwai ezzen vnd dez margens alsam tze dem mal, als da gewonhait ist, van dem selbem weingarten. Vnd daz das staet hin fv^er beleib vnd vntzerbrochen, dar vber gib ich disen offen brief versigelten mit der stat Insigel tze Steyr, sind ich aigens Insigels nicht enhan. Des sind auch getzivg Ott der Chersperger, Heinrich der Mochler, Ott der Grevl, Ott Pernutzel, Hiltprant der Chromer, Heinrich der welwer mein swecher, Ott der Rvsel vnd andere bidewer levt genvch. Der brief ist gegeben, da van Christ burd warn ergangen Drevtzechen hundert iar, dar nach in dem tzwair min dreizzigistem iar an sand Thomas tag.

Source Fulltext: OÖUB 5 (Wien 1868) S. 531, Nr. 530