Ich Rudiger der Vogt tze den tzeiten Pfleger tze Weitenekk vergich offenwar an disen brief, daz ich mit gutleichem willen vnd nach guter friunt rat vnd weisung gestanden bin van allen dem chrieg vnd van aller der ansprach, di ich gehabt han hintz dem Gotzhavs tze Glevnich vmb einen Weingarten, der gelegen ist tze Chrems in der widem vnd haizzet der Ger, der mein rechtev Margengab gewesen ist van weilen miner Haustrowen fron Gerwirgen der Durstinn van Stain, der got gnad, vmb Sechs vnd dreizzich pfunt pfenning wienner mvntz, der ich gantz vnd gar gewert bin van dem erbern herren Abt Engelschalich datz dem selben Gotzhavs tze Glevnich also, daz ich noch all mein erben oder friunt hin fvr dehain ansprach oder chrieg habn sullen nach dem var gnantem weingarten. Vnd daz das van mir staet beleib vnd vnvercheret, dar vber gib ich disen offen brief versigelten mit minem aigen anhangundem jnsigel vnd mit des erbern herren jnsigel Techent Ludolfs van Chrems, der des selben weingarten Perchherre ist, tzv einem ewigem vrchund gantzer sache vnd aller warhait. Der brief ist geben, da van Christsburd warn ergangen Drevtzechen hundert iar, dar nach in dem vier vnd dreizzigistem iar an sand Georgen tag.

Source Fulltext: OÖUB 6 (Wien 1872) S. 118f., Nr. 111