Ich Friedreich der Steger datz Steyr vergich offenwar an disem brief vnd tv^en chunt allen den, di in sechent, lesent oder lesen ho^ernt, di nv lebent oder her nach chvmftich werdent, daz ich mit wol bedachtem mv^et vnd mit meiner Hausfravn Agnesen vnd aller vnserr erben vnd freunt gu^etleichem willen vnd rat vnd tze der tzeit, do ich ez wol getv^en macht, meines rechten chauf aigens ein Gu^et, daz gelegen ist tze Goltperg in Syrnicher Pfarr, ledichleich gegeben han den erbern vnd geistleichen herren abt Petern vnd der Samnvng des Gotshauss datz Glevnich mier vnd meinem Pru^eder Chvnraten, dem Got gnad, vnd allen vnsern vordern tze einem rechten Selgeraeat also beschaidenleich, daz si alle Mo^entag van dem selben gu^et in irem vorgenanten Gotshaus datz Glevnich auf sand Katrein alter ein Selmess haben suln mit vier phenning obfer vnd suln auch jerleich mein vorgenanten Pru^eder jartag begên des nachsten tags var sand Nyclas tag also, daz si an sand Barbare Tag tze der Vesper ein Vigili singen vnd darnach des Morgens an sand Nyclas abvnt ein gemeinew gesvngen Mess mit einem gmainen gebet vns vnd allen vnsern vordern tze hilf vnd tze tro^est vnd auch des selben tags sol der Oblayer, der daz vorgenant Gu^et inne haben sol, den Herren in dem Conuent raichen ein halb phvnt phenning wienner mvntz an allen aufschu°b. Waer awer, daz si savming wern an demselben jartag oder Messen, so suln sich vnser nachst erben des vorgenanten Gu^ets vndertziechen vntz allez daz widertan wiert, daz an dem vorgeschriben Selgeraet, anVigili vder Messen versavmt ist. Vnd pin ich vorgenanter Fridreich der Steger vnd mein Hausfrav Agnes vnd alle vnser erben des egeschriben Guets der vorgenanten Herren vnd des Gotshauss datz Glevnich recht Scherm vnd gewêrn tze hof vnd tze Taiding, swo in des not geschiecht, fuer all ansprach. Vnd daz di red diser sache staet beleib vnd vntzebrochen, dar vber gib ich vorgenanter Fridreich der Steger den êgenanten Herren vnd dem Gotshaus datz Glevnich disen gegenburtigen offen brief tze einem vrchvnd vnd tze einer rechten staetichait diser sache bestsetten vnd versigelten mit mein selber aigem anhangvndem jnsigel vnd auch mit hern Otten des Schekchen vnd hern Vlreichen van Zenning anhangunden insigeln, di auch derselben sache getzeug sind. Der brief ist gegeben, da van Christs geburd waren ergangen dreutzechen hvndert jar dar nach in dem sechs vnd dreizzigisten jar an sand Merteins Tag.

Source Fulltext: OÖUB 6 (Wien 1872) S. 218f., Nr. 213