Ich Philipp van Mauthausen Burger ze Ens vergich offenwar an disem brief vnd tv^en chunt allen den, di in sechent, lesent oder ho^ernt, di nu lebent oder her nach chumftich werdent, Daz ich mit wol bedachtem mvt vnd nach freunt rat vnd mit meiner Havsvravn Chunigunden vnd aller meiner Erben gu^etleichem willen vnd ze der zeit, do ich ez wol getv^en macht, ledichleich geben han dem Gotshaus ze Gleunich vnd den erbern vnd gestleichen (sic) Herren Abt Petern vnd der Samnung da selbe meiner hab einen Weingarten, der gelegen ist ze Spitze am Setzberg, der genant ist der Trauner, van dem man dient dem Erbern Herren van Chunring alle jar an sand Georgen tag einen halben phenninch vnd an sand Cholmans tag einen halben phenninch ze Burchrecht vnd zv dem Lesen einen halben Emmer weins ze Perchrecht vnd nicht mer, mier vnd allen meiner vordern Seln zv einem rechten Selgeroet, vnd pin auch ich vnd mein vorgenantev Havsvrav Chunigund vnd all vnser erben des selben Weingarten ier scherm vnd ier geber ze Hof vnd ze taiding fu^er allen chrieg vnd fu^er all ansprach, vnd han auch in den vorgeschriben Weingarten gegeben vnd gevertigt nach Lantsrecht mit solcher beschaidenhait, daz den vorgenanten Weingarten, wer Abt in dem êgenanten Gotshaus ist, inne sol haben vnd paun vnd des Gotshauzs frum damit schaffen, wie er welle, an daz er jaerleich an meinem jartag, swie er geuellet, den Herren in dem Conuent da van geben sol zway phunt gmainer pfenning wienner munzz an all furtzicht, vnd svllen die vorgenanten Herren an dem selben meinem jartag dar vmb meiner vnd aller meiner vordern sel gedenchen mit einer gemainer gesungen Vigili vnd mit einer gemainer gesungen Sel Mess an allen vnderlaz vnd an all furzicht. Geschaech des alles nicht, oder ir ainz, so daz der Abt den Herren in dem Conuent zwayr phunt phenning an meinem jartag nicht engaeb, oder daz di selben Herren mein vnd meiner vordern mit Vigili vnd mit Mess nicht gedaechten, als vor geschriben stet, tzehant sint si geuallen, der Abt vnd der Conuent ze Gleunich von allen den rechten, di si an dem vor genanten Weingarten heten oder haben solden, vnd wenne di selb saumung mit einer rechten chuntschaft vnd mit einer gantzen warhait fu^er chumt dem Rat vnd den Burgern tze Ens, di suln sich des vor genanten Weingarten mit rechter gewêr vndertziechen vnd in dem Spital datz Ens ine antworten, vnd sol der Spitalmaister daselb den siechen ier phru^end da van pezzern nach der Burger rat vnd nach seinen trevn. Vnd daz das hin fu^er staet beleib vnd vntzebroehen, dar vber gib ich vorgenanter Philipp van Mauthausen vnd mein Hausvrav Chunigund vnd all vnser Erben dem vorgeschriben Gotshaus tze Gleunich disen gegenbu^ertigen offen brief versigelten vnd bestaetten mit der stat tze Ens anhangunden Insigel tzv^e einer gantzen staetichait vnd tzv^e einer ewigen warhait aller sache, als vor geschriben stet. Der brief ist gegeben tze Ens, do van Christs bu^erd warn ergangen Dreutzechen hundert jar, darnach in dem suben vnd dreizzigisten jar an sand Gregorij Tag.

Source Fulltext: OÖUB 6 (Wien 1872) S. 234f., Nr. 230