Wier Heinrich van gotes gnaden apt tze Glevnich vergechen offenwât an disem brief, daz wir jaehrlich van dem weingarten, den vns die erber frow^ frow^ Chvnigunt weilen Fridreiches an Davm haûsfrôw^e burger tze Ens, dem got genad, geben hat, der gelegen ist datz sand Michel in der Wachaw^ vnd haizzet der Reinspech, ier vnd irem vorgenantem wiert Fridreîchen vnd allen iren uadern seien tzu einem rechtem selgeraet, geben vnd raichen sullen des nasten Svntages nach sand Cholmans tag irem Sv^en Otten, der auch in vnserm gotzhaus mv^enich vnd bru^eder ist, ein pfvnt pfenning gemain wiener mvntz alle di weil, vnd er nicht priester ist, Vnd sullen wier aûch daz selb pfvnt pfenning raichen der vorgenanten Chvnigunden seiner mu^eter an dem vorgeschriben Svntag nach sand Cholmans tag an alle fu^ertzicht, daz si im datz tze nu^etz vnd tze pezzrung, vntz daz er priester wirt an lege. Wenne awer daz ist, daz er tze priester geweicht wird, so sullen wir daz êgenant pfunt pfenning geben vnd raichen vnserm conuent vnd sol der conuent dar vmb an dem vorgenanten Svntag ir vnd allerr ierr vadern sei gedenchen mit einer gmainer gesungner vigili vnd dar nach des naesten tages mit ainer gmainer gesungener selmesse an allen vnderlaz vnd an all fu^ertzicht. Geschaech des nicht oder daz wir ir daz vorgenant pfvnt pfenning nicht gaben an dem selben tag, als var geschriben ist, so sullen sich ier naest erben vnd der richter in der vorgenanten stat tze Ens des vorgenanten weingartes vndertziechen an nutz vnd inne haben als lang, vntz daz di saumung, di sich dar an vergangen hat, werd widertan vnd volpracht. Vnd daz daz hinfu^er staet belib, dar vber geben wir in disen gegenbu^ertigen offen brif versigelten mit vnserm aygen anhangunden jnsigel. Der geben ist, do van Christes gepu^erd warn ergangen driutzechen hvndert jar, dar nach in dem echt vnd virtzigisten jar an Sand Cholmans tag.

Source Fulltext: OÖUB 7 (Wien 1876) S. 73f., Nr. 74