Ich Nycla, Ich Go^erg Bruder weilen Chvnrats des Sneider Sv^en, dem Got genad vnd alle vnser erben sv^en oder to^echter vergechen offenwar an disem brif, daz wier vnuerschaydenlich von vnserm genaedigen erbirdigen herren Apt Heinrichen vnd van der bru^ederschaft gemain von Glevnich empfangen vnd genummen haben driv gut an dem Gumpenperg iers aygens, di si vns gelichen habent tzu einem cinslechen, di genant sind: tzwai an der Hueb vnd ainez an dem O^ert, mit allen den rechten vnd nu^etzen vnd gesu^echen, di dar tzu^e geho^erent, versucht vnd vnbesucht, als ez von alter her cho^emen ist, vnd sullen des vnser herren vnd gaewer vnd verantwurter sein, wo vns des no^et geschieth, nach des landes recht, also beschaydenlich, daz wir in jaehrlich an vnser Vrowen tag in demheribst, als si geparn ist, da von eins raichen vnd geben sullen von iedem gu^et siben pfenning Graetzer mvntz irem gotzhaus hintz Glevnich, vnd sullen wier den eins antwurten in daz Gaerstental ierem Amptmann. Taeten wier des nicht vnd daz wier daz vertzugen sechs wochen nach dem vorgenanten vnser Vrowen tag, so sey wir geuallen von allen vnsern rechten, di wir dar an haben, vnd sol man auch den cins vnuertzogenlich von vns nemen, wenne wir in da hin senden in den sechs wochen an allen schaden, vnd eenn wir daz gu^et versetzen oder verchauffen, daz sullen wier tuen mit ier hant vnd sullen si daz leichen mit den rechten an ierrung vnd allz vertzichen ir vnd iers gotshaus, vnd sullen wier di selben wandlung an sev vnd an ir gotzhaus in vier moneyden pringen nach der wandlung. Taeten wier dez nicht, so seyn wir awer nach den vier moneyden geuallen mit vrchvnd ditzs briefs von allen vnsern rechten, den wier in dar vber geben mit vnsern payden aygen anhangunden jnsigeln versigelt, dar vnder wir vns verpinden vnuerschaydenlich aller sachen, di vor geschriben stet, der geben ist nach Christes gepu^erd driutzechen hvndert jar, in dem echt vnd virtzigistem jar an vnser Vrowen tag tze der Lichtmesse.

Source Fulltext: OÖUB 7 (Wien 1876) S. 45f., Nr. 50