GUIDO miseratione diuina titvli sancte Cecilie presbiter cardinalis, apostolice sedis legatus dilectis in christo abbati et conuentui monasterij sancti Andree in Glunich ordinis sancti Benedicti Patauiensis diocesis salutem in domino. Illas peticiones ad exaudicionis graciam admittimus non indigne, per quas ecclesiarum et monasteriorum utilitati consulitur et personarum necessitatibus prouidetur. Exhibita siquidem nobis vestra peticio continebat, quod fructus redditus et prouentus predicti monasterij vestri sunt adeo tenues et exiles, quod vos ex eis non potestis conmode sustentari nec vobis incumbentia onera supportare, quodque dormitorium, de quo in eodem monasterio maxime indigetis, edificari facere aliquatenus non potestis, propter quod nobis humiliter supplicastis, ut vobis paterno compacientes affectu deberemus super predictis de oportuno remedio prouidere et parrochialem ecelesiam sancti Seuerini in Hedershouem in vicino predicti vestri monasterij sitam, in qua ius patronatus asseritis vos habere cuiusque fructus, redditus et prouentus decem marcharum argenti valorem annuum non excedunt, cum omnibus iuribus et pertinencijs suis predicto vestro monasterio vnire et incorporare de speciali gracia dignaremur. Nos igitur de predictis debita informatione recepta volentesque yobis super premissis, quanto salubrius possumus, prouidere predictam ecclesiam sancti Seuerini cum omnibus iuribus et pertinencijs suis monasterio vestro memorata auctoritate, qua fungimur, tenore presentium vnimus, incorporamus ac in perpetuum annectimus ita, quod cedente uel decedente rectore ipsius ecclesie sancti Seuerini, qui nunc est, uel ecclesia ipsa quocunque alio modo vacante liceat vobis et successoribus vestris, qui pro tempore fuerint, predictam ecclesiam sancti Seuerini cum omnibus iuribus et pertinentijs suis et corporalem possessionem eiusdem ingredi ac etiam libere apprehendere et tenere, ipsiusque fructus, redditus et prouentus in proprios vsus conuertere consensu alterius cuiuscunque minime requisito prouiso, quod predicta ecclesia sancti Seuerini debitis obsequijs non fraudetur, sed faciatis ibidem, prout oportunum extiterit et est alias fieri consuetum desseruiri laudabiliter in diuinis. Nulli ergo omnino hominum liceat hanc paginam nostre vnionis, incorporacionis et annexacionis infringere uel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se nouerit incursurum. Datum apud Znoymam Olomucensis diocesis viij. idus septembris, pontificatus dominj Clementis pape vj. anno octauo. R. du Nathoy.

Source Fulltext: OÖUB 7 (Wien 1876) S. 130f., Nr. 132