Ich Chnnrat von Schalnperg mit allen meinen erben vergich offenbar vnd tun chund, daz wir genumen vnd enphangen haben von dem erbern vnd geistleihen herren herrn Heinreichen apt ze Glunich ze rechtem purchrecht ein holcz gelegen in dem Tiwfenpach an der Glunicher leiten, da wir jerleich von dinen vnd raichen sullen dem gotshaus ze Glunich achzehen phenning wienner munzz an sand Giligen tag zu einem rechten purchrecht vnuerczogenlich. Teten wir dez nicht, so sae wir dez nachsten tags darnach veruallen dez wandeis als purchrechtes recht ist. Vnd seind wir aigens jnsigels nicht enhaben, so geben wir dem erbern herren hern Heinreichen apt ze Glunich vnd dem gotshaus da selben den prief ze einem zeug, daz dasselb holcz von gruntrecht gehort zu dem chloster dacz Glunich, versigeltes mit meins herrn apt Christans von Paumgartenperg anhangunden jnsigel, wann wir aigens jnsigels nicht enhaben. Geben nach Christs purd dreuczehen hundert jar, in dem vir vnd fumfczigisten jar an dem heiligen pfingsttag.

Source Fulltext: OÖUB 7 (Wien 1876) S. 363f., Nr. 353