Ich Wirnhart der Steger vnd ich Margret sein hausfraw^oe vnd ich Nicla vnd ich Chůnrat die Sintzendorfer vnd mit vns alle vnser erben swi di genant sint, vergehen vnde tun chunt allen den, die den brief sehent oder ho^erent lesen, daz wir mit wol verdachtem můt vnd mit gůtlichem willen gesetzt haben vnsers gu^etz ain freis aigen genant datze den Ho^eltzern in Siernicher pfarre mit allev dev vnd dar zu geho^ert swi daz genant ist, besucht vnd vnbesucht, dem gotzhaus ze Stadel vnd dem pfarrer doselbs vnd den erbern geistlichen herren dem abt vnd der sammung ze Glevnch, die daz selb gotzhaůs ze Stadel angeho^ert mit geistlicher gewerschaft, fur fu^enf vnd dreizzich pfvnt pfening wienner munss, vns vnd allen vnsern vodern zu aim ewigen selgeraet, vnd sol auch daz obgenant gůt all iar dienn an vnser vrawen tach zu der dienstzeit ain pfvnt wienner pfening vier hirbsthu^ener ein gans fu^enfzehen schulter (sic) pfening zwai vaschang hu^ener fu^enf ellen ru^epfeins tuches zehen pfening fur ain lamp zwen chaes vnd virtzich air, vnd daz sol der pfarrer ze Stadel stiften vnd sto^ern nach lantz recht, vnd sullen wir auch dez gewer sein vnd sullen ez schermen fur alle chrieg vnd ansprach nach lantz recht, vnd gieng dem obgenanten gotzhaus ze Stadel an dem satz icht ab mit recht, daz sulle wir im ablegen vnd widerchern vnd daz sol daz genant gotzhaus ze Stadel vnd die obgenanten herren haben aůf vns vnd auf aller vnser hab wo wir die haben. Daz daz also staet vnd vnzerbrochen behalten werd, gib ich obgenanter Wirnhart Steger vnd ich obgenanter Chunrat Sintzendorfer den brief versigelten mit vnsern anhangenden insigeln, dar v^onter ich mich obgenanter Nicla der Sinlzendorfer derselben taiding mit mein trewen verpint wann ich selb aigens insigls nicht han, vnd zu ainer guten geziuehnu^esse mit Hainrichs dez Stadler aus der Taenn insigel im an schaden, vnd ist geschehen, do man zalt von Christi gepu^ertt dreuzehenhůndert iar vnd in dem sechs vnd fu^enfczichistem iar an sant Gorgen tach.

Source Fulltext: OÖUB 7 (Wien 1876) S. 446f., Nr. 441