Ich Du^erinch der Sazzer vnd ich Torathea sein hausfraw vnd mit vns alle vnser erben swi di genant sind vergehen mit dem offen brief, daz wir ze chauffen haben geben Erasem dem Schreiber purger ze Steir vnd seiner hausfrawen Chunigund vnd seim bruder Jansen vnd allen irn erben vnsern hof genant an dem Preunensperg gelegen in Neunchircher pfarr der vnser lehen ist gewesen von vnsern genaedigen herren den hertzogen in O^esterich, vnd ainn acher do inne der vnser lehen ist gewesen von den Rorern, mit allen den rechten vnd nv^etzen di darzv gehornt vmb zway vnd sehtzzich pfunt winner pfenning der si vns gar vnd gantz verricht vnd gewert haben mit beraiten pfenning. Daz daz also staet behalten werd, gib ich obgenanter Du^erinch der Sazzer fu^er mich vnd alle mein erben den brief versigelt mit meim anhangunden insigel, vnd zv ainer guten ziuchnu^esse mit dez erbern ritters insigel hern Niclas des Schekhen zv der zeit purkhgraf ze Steir, der dez genanten gu^etz lehenherre ist an der fu^ersten stat, vnd mit hern Hainreichs dez Prevhafen insigel, vnd ist geschen do man zalt von Cristi gepurtt drevzehen hundert iar vnd in dem neun vnd fu^enftzichistem iar dez samstags vor faschang.

Source Fulltext: OÖUB 7 (Wien 1876) S. 621f., Nr. 612