Ich Weymar der Tewrwanger purger ze Steyer ich Chunigund sein hawsvrowe vnd mit vns all vnser erben veriehen offenbar, - daz wier - vnsern hoff dacz den Swaeben, ain hofstat dapei gelegen vnd zwo hofstet in dem Newmraeut, di ain da Hainreich auf siczt, di ander da der Smyd auf siczt, vnd daz gu^etel in dem Snekenslag die all in Hager pharr gelegen sind, vnd zway gueter auf dem Helmprechto^ed gelegen in Wolfspecher pharr, di vnser recht lehen sind van vnserm lieben genaedigen erwirdigen herren dem pischolf van Babenberch, geschaft vnd gegeben haben nach vnserer payder to^ed dem gotshaws ze Glunich zu einem ewigen selgereet mit allen den nu^eczn vnd rechten, di darzu geho^ernt - mit sampt dem schachen der darin gehört, die wir dem vorgenanten gotshaws ingeantw^ert haben in nucz vnd gewer mit gesampter hant ie daz gu^et mit zwain pfenning fo^er ein huen also beschaydenlich, ob daz ist, daz wir di selben gu^eter var ehafter no^et mu^egen behaben vnd versparn in solher mainung, daz dann di herrn in dem chloster vns vnd allen vnsern varuadern gelawbigen seln darvmb sprechen sullen all tag ein mess ewichlich auf sand Andres-alter da selbz, di auch taeglich dez ersten sol werden gesprochen, vnd der selben mess sol all wochen gesprochen wern zwo van vnser frowen schiedung, zwo van gotsleichnam, zwo selmess, ainew van sand Andre, darvmb dem herrn der sei spricht geraicht sol wern vier pfenning tegleich. Si sulln vns auch begen einen ewigen jartag jaerleich svnebenten vber acht tag mit einer gemainen gesungen vigili vnd mit einer gemainen gesungen selmess, darvmb dem conuent geben sol werden jaerleich ein phunt pfenning wienner mu^enzz. Darzu sullen si vns haben ein ewigs licht mit pawmo^el, daz nacht vnd tag ze aller zeit prinne var gotsleichname daselbz. Ez sol awch der apt dez vorgenanten gotsaws die benanten gu^eter mit allen nu^eczen selb inn haben vnd davan di mess den jartag vnd das liecht an vnderlaz verrichten. Geschaech dez nicht, vnd daz si an dem egenanten selgeraet allen sawmig wern vnd nicht alz gaenczleich volpraechten alz geschriben stet, so mugen sich vnser naechst erben der vargenanten gueter aller vnderwinden vnd die nu/ccz an der armen leut schaden darauf inn haben, als lang vnczt daz di saumung di sich an vnserm egenanten selgeraet het vergangen mit einer gwissen wert widertan vnd volpracht. Waer aber daz getan, daz der pischolf van Babenberkch der genanten gu^eter lehenherre di wandlung nicht staet wolt haben, di mit dez vogtz hant vnd vnderm seim insigel geschehen ist vnd damit tun wolt wider der prief sag di si van seinen vnd seiner varuadern gnaden darvmb haben, dez sull wier vnentgalten sein an vnserm genanten selgeraet, ich vorgenanter Weynmar mein hawsvrowe vnd vnser erben. Waer awer daz, daz wir sein nicht mo^echten versparen als var geschriben stet, so sull wir ez alz verseczen oder verchawffen daz si vns nindert in dhainen wegen irren sullen. Vnd daz di red stet vnd vnuerchert beleib, darvber geben wir in den offen prief versigelt mit dez erbern mannes Vlreichs von Rewerbach ze den selben zeiten vogt ze Hag anhangunden insigel wann wir aygner jnsigeln nicht enhaben, darvnder wier vns jch vorgenanter Weynmar vnd mein hawsvrowe mit allen vnsern erben mit vnsern trewn verpinten allez daz staet ze haben daz an dem prief geschriben stet. Vnd zu einer pessern sicherhait der selben sach mit der erberen leut Ruegers dez Zawchinger der in derselben vogtay gesessen ist, vnd Hainreichs dez Velber purger ze Steyer anhangunden jnsigeln zu einer waren geczewgnu^ezz wol bestettet. Der prief ist gegeben da van Christi geburd warn ergangen drewczehen hundert iar darnach in dem sechczigisten iar an sand Merteinstag dez heyligen pischolf.

Source Fulltext: OÖUB 7 (Wien 1876) S. 727ff., Nr. 725