ICH Erasm der Schreiber purger ze Steyr und mein hawsvrovve frow Chu^enigund und all unser erben wier vergehen, daz wier dem gotshaws ze Glu^enich gegeben haben und geben auch unser haws ze Steyr in der stat davan man ja^erleich geit dem herczogen in sein schaczstewer drey schilling pfenning wienner mu^ezz, und daz gelegen ist zwischen Perchtolcz dez Ponhalm haws und Ulreichs des Chochs haws. auch geben wier in unsern hof genant an dem Preunneinsperg in Neunchircher pfarr gelegen und unser mu^el genant di Darnmu^el in Chempnater pfarr gelegen mit allen den rechten und nu^eczen so wier sew genozzen haben, auz unser nu^ecz und gewer in diw irn also beschaidenlichen, daz siw mein des vargenanten Erasm und meiner hawsvrowen Chu^enigunden unser leibgeding sullen sein unczt an unsern to^ed van dem vargenanten gotshaws ze Glu^enich, und sullen wir jerleich an sand Andres tag in die gustray da selbz van den zwayn guetern raichen sechs pfenning ze einem cins unverczogenlich. Dann nach unserm to^ed sullen sich die herrn der gueter undercziehen in di gustray und sullen das selgera^et davon begen alz fu^erbaz erchant wiert. Auch sol sich der apt nach unserm to^ed dem gotshaw^es des haws underziehen und allen seinen frum damit schaffen mit verchawffen mit verseczen wie er wil also beschaidenlich, ob mein wiert der vargenant Erasm di obgenanten guet und daz haws versparen well und mag verziehen (sic). mit u^erchund dez priefs versigeltz mit der erbern leutt Heinreichs des Chu^endler ze den selben zeiten statrichter ze Steyr und Janseins des Ttungassinger payder anhangunder insigeln under der insigeln wir uns verpinden ich vargenanter Erasm und mein hausvrow Chunigund allez daz sta^et ze behalten duz an dem prief geschriben stet. Der prief gegeben ist do man zalt nach Christes gepu^erd dreuczehen hundert jar darnach in dem acht und sechczigisten jar an sand Thomas tag des heiligen zwelfpoten.

Source Fulltext: OÖUB 8 (Wien 1883) S. 401, Nr. 406