Wir Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tun chunt umb den hof der gelegen ist an dem Preunesperg in Na^ewnkircher pharre, und umb die mu^el geheizzen di Dornmu^el gelegen in Kemnater pharre, die unser getrewr Erasem der Schreiber unser purger ze Steyr von uns ze lehen hat, daz wir die aigenschafft desselben hofes und der mul durch Got lautterlich und durch unsrer vorvordern und unserr selen heiles willen gegeben haben und geben ouch wizzentlich den erbern geistlichen dem abt und dem convent ze Gleunkch in namen und an stat ir und desselben ires klosters also, daz si dieselben aigenschaft furbaz ewichlich haben mit allen den wirden rechten und eren als wir die daher gehabt haben an allez geverde, mit urchund dicz briefs. Geben ze Steyr an mittwochen vor sand Mathei tag des zwelfbotten nach Christes gepurde dreuczehenhundert jar darnach in dem acht und sechczigistem jare. Magister curie de Liechtenstain et Wehinger magister camere.

Source Fulltext: OÖUB 8 (Wien 1883) S. 395, Nr. 398