Wier Marchart von Gotes genaden abpt und die samnung cze Glewnich verjechen offenbar an disem prief, daz wier genomen und enphangen haben von Gotfriden von Sinczenperg seins rechten lechens ain gu^et daz gelegen ist ze Luechopell in Tuedicher pfarr an dem Anger genant, daz er uns ledichleich mit aller seiner erben und auch frewnt ra^et und gu^etleichem willen und mit der edeln herren hant hern Jo^ergens und hern Seybotz und hern A^ertolfs von Volchenstorf in unser oblay gegeben hat ze ainem rechten sellgera^et also weschaidenleich, daz wier davon im und allen seinen vo^erva^edern ja^erleich ain ja^ertag begen schullen des nachsten erichtags nach dem aufferttag mit ainer vigilij und mit ainer gemainen mess und mit zwain gesprochen messen dapey also, daz man des selben tags den herren in dem convent geb auch da von ain phunt wienner phenning noch nicht mer noch minner, davon man den drin priestern raichen scholl iglaichem vier phenning geltz und achczechen zu^e den cherczen und di siben schilling der gemain und dem mesner sechs phenning uber daz phunt; die selben phenning man raichen scholl von dem egenanten gu^et an alle ierrung des nachsten mantags nach dem aufferttag und zwai vogt huener in die abtay. wer awer daz des nicht gescha^ech und daz di mess und der ja^ertag im verczogen wurden, so schu^ellen die nachsten erben sich des selben guets undercziechen so lang uncz das all die saw^emung werd wider tan die an den messen oder jarta^egen ist ergangen dem gu^et und dem man an schaden. Und daz im daz hin fu^er staet weleib und unczebrochen, daruber geb wier disen offen prief versigelten mit unsern baiden insigeln. Der prief ist gegeben, da von Christes gepu^erd Maren ergangen drewczechen hundert ja^er darnach in dem drei und sybenczchisten ja^er des nachsten suntags nach sand Go^ergen tag.

Source Fulltext: OÖUB 8 (Wien 1883) S. 646f., Nr. 647