Ich Jo^erig von Volchenstarf und all mein erben verjehen, daz wir ledichleich und freyleich geben haben diw aygenschaft die wir heten auf zwain gu^etern als her nach geschriben stet, der aincz leit ze Lewchopel da ze den zeiten auf gesezzen ist Heinreich der Angerer gelegen in Tuedicher pfarr, daz ander haizzet der Gebharczperg gelegen in Haederhofer pfarr mit zehent mitt all, da ze den zeiten auf gesezzen ist Ott der Lerchperger, dem goczhaůz ze Glewnikch und der pru^ederschaft daselbs in ir oblay inndercleich durch Got durch meiner und meiner vorvardern und nachchomen sel hayl willen also beschaidenlych, daz ich noch mein erben gegen der aygenschaft chain ansprach mit recht noch an recht nymmermer haben schu^ellen. Wir seyen auch der vorgeschriben aygenschaft ir herren und ir gewer fu^er unz und fu^er all unser nachchomen nach dem lantrecht. Daz diw red staet und u^enzerbrochen beleyb dar u^eber geben wir in disen offen gegewu^ertygen brief versigelt mit meinem aygen ahangunden (sic) insigel, und mit der erbern chnecht Hainreichs dez Cherspergers und mit Petreins dez Hinderholczers anhangu^enden insigeln. Der brief ist geben nach Christez gepu^erd driwzehen hu^endert ja^er und dar nach in dem driw und sibenczgistem jar an dez heyligen herrn sand Marci tag.

Source Fulltext: OÖUB 8 (Wien 1883) S. 644, Nr. 644