In nomine Jesu Christi Amen. Ne, que peraguntur sub tempore, per obliuionis defectum ab humana memoria decidentur, statuit ea antiquorum prouidentia litterae testimonio perennari, hinc est, quod nos Henricus diuino numine Abbas Monasterij Sancti Michaelis in Peurn Ordinis Sancti Benedicti Salisburgensis Diocesis, Perchtoldus Prior totusque inibi Conuentus tam presentium memorie quam futurorum notitie inculcamus, Quod, cum Religiosus sacer Ordo principaliter hoc exigat et requirat, vt sub eo militantes personae consolationibus inuicem se praeueniant et portantes alter alterius onera mutuum sibi exhibeant officium Charitatis, Nos quoque scientes et sentientes a Domo Sancti Andree in Glunickh nos fraterne, pie ac amicabiliter sepius consolatos, omnium nostrorum voluntate, consensu et consilio accedente inter domum predictam et nostram perpetuam inire decreuimus vnionem amicitiae, propter quam inter nos et fratres predicti loci firma fraternitas semper uigeat et indissolubilis nexus Charitatis et amicitiae perpetuo obseruetur. Omnium itaque Suffragiorum, quae authore Domino orationibus, Vigilijs, elemosinis, jeiunijs ac alijs bonis operibus per nos celesti Principi offeruntur, uos uestrosque Successores tam in vita quam in morte participes plenarie facimus et consortes, Adjicientes pietate deuota, vt quicunque de vestro Collegio ac gremio siue ex culpa siue penitus sine culpa pro Solatio vel pro metu ad nostram Ecclesiam declinauerit, stallum in choro, locum in refectorio, in dormitorio et equam portionem in prebenda, in remedijs, oblationibus et quibuscunque consolationibus perfruatur, quo singuli fruimur et gaudemus. In cuius rei testimonium et memoriam perpetuo duraturam presens scriptum uobis concedimus Sigillorum nostrorum uidelicet Abbatis et Conuentus munimine roboratum. Datum in Peürn Anno millesimo trecentesimo Septuagesimo septimo, in die Sancti Aegidij Confessoris.

Source Fulltext: OÖUB 9 (Wien 1906) S. 305-306