Wir Lamprecht von gots gnaden Byschof zů Bamberg Bekennen Offenleich mit disem briefe, Wann vnser Lieber getrüwer Weinmar Türnwanger¹⁾ Burger zů Steyre den Erbern vnd gaistlichen dem abt vnd Conuent gemainleich dez Closters zu Glewnich sant Benedicten ordens in Passawer Bystum gelegen vnser vnd vnsere vordern stifte Etlichew gu^eter, die von vns vnd vnserm Goczhaus zu Bamberg ze Lehen gen, geben vnd vermacht ha^et nach seinem tode, als die briefe daz sagen, die er in darüber geben ha^et, dez haben vns gebeten die egenanten der abt, der Conuent vnd auch winmar Türnwanger, daz wir darzu als ain lehenherre vnsern willen vnd gunst gerůchten ze geben. Dez haben wir angesehen ir redleich demu^etig bete vnd haben auch sunderleich gote ze lobe vnd ze eren zu dem Egenanten gescheft vnd vermachunge, als der egenante brief saget, vnsern willen vnd gunst geben vnd geben auch mit vrkünde dis briefs versigelt mit vnserm anhangenden Insigel vnd geben zů Hage am Samstag nach Egidij, Do man zalt nach Christes geburt dreyzehenhundert jar dar nach in dem Süben vnd Sůbenczigistem Jare.

Source Fulltext: OÖUB 9 (Wien 1906) S. 308