Ich Vrsula Stephleins des Chersperiger witib dem got genad vnd all mein Erben veriehen offenleich mit dem prief vnd tun chunt allen den dy in sehent ho^erent oder lesent, Vmb den Sitz vnd den Hof datz Za^ennig gelegen in Syednikcher phar das der erber Herr Her Ha^ertneyd von Winkchel von meinem lieben prueder Siglein dem Ponhalm gechawfft hat, als sein Chawfprief lawttet, den er von ym vnd seinen Erben dar vmb hat, Da verpind ich mich obgenante Vrsula mit dem prief, Das derselb Chawf vnd dy Handlung mit meiner vnd meiner Erben gunst vnd guetem willen geschehen ist, Vnd hab mich auch des obgenanten Sitz vnd Hofes datz Za^ennig mit aller zu^egeho^erung fu^erczicht tan vnd verczeich mich auch der gancz vnd gar mit dem prief, das ich vnd all mein Erben vnd nachko^emen fu^erbas chain ansprach noch zu^espru^ech dar gegen nymmer mer haben noch gewingen schu^ellen weder vmb vil noch vmb wenig weder mit recht noch an recht in chainer weis an alles geuär, Vnd was ich oder mein Erben fu^erbas da wider zu^espru^ech oder ansprach gewungen, es wa^er mit recht oder an recht, das schol chain chraft wider den prief nicht haben vnd schol in nicht schad sein, Vnd des alles zu ainem waren vnd sta^eten v^erchunt geben wir in den prief Besigelten vnd wol besta^ett mit meiner lieben Pru^eeder Sigleins vnd Hansen der Ponhalm paider anhangunden Jnsigeln, dy ich dar vmb vleizzichleich gepeten hab, Vnder der paider Jnsigel ich mich obgenante Vrsula vnd all mein erben verpinden mit vnsern trewn an aydes stat alles war vnd sta^et ze haben vnd ze volfu^eren das an dem prief geschriben ist wenn ich aygens Jnsigel vnd dye zeit chainen wirt nicht het. Der prief ist geben do man Zalt von Christi gepu^erd drewczehen Hundert Jar vnd darnach in dem achczkisten Jar an aller Heiligen tag.

Source Fulltext: OÖUB 9 (Wien 1906) S. 894-895