Jch Wolfgang der frey. vnd mein Hawsfraw^o. vnd mit sampt vns alle vnser erben, wie die genant sind - wir vergehen. vnd tu^en chunt mit dem offen prief vor allen Lewten - gegenwůrtigen vnd chunftigen, Daz wir mit wolbedachtem můt mit gu^enst vnd willen vnser erben vnd nach weisung vnd rat meiner nachsten vnd pesten frewnt zder zeit vnd wir daz mit recht wol getu^en machten recht vnd redleich ze chauffen geben haben, vnser Hu^eb dacz Lewbrestorf niden in dem dorffe ¹⁾ gelegen - geng dem prunne vber in Syrdnicher pharre die lehen ist von Hern Jo^ergen von Volchenstorf, dem erbern Hainreichen dem Chersperger seiner Hawsfrawn vnd allen seinen erben - vnd haben in auch dieselben Hu^eb gegeben aws vnser nutze vnd gewer in ir nutze vnd gewer mit allen den eren rechten vnd nuczen die dar zu^e geho^erent vnd da von becho^emen mugen cze Holcze. ze velde. ze wismad. ze wazzer ze waide ez sei gestifft oder vngestifft. gepawen oder vngepawen, wie daz alles genant ist versu^echt vnd vnuersu^echt, vmb ain gelt, dez si vns gancz vnd gar gericht vnd gewert habent, Also daz wir noch alle vnser erben hincz derselben Hu^eb nimmer mer dhain zu^espruch noch ansprach haben noch gewinnen sullen weder mit recht noch an recht - vnd tu^en vns auch der mit dem prief ze fu^erczicht. Wir wollen vnd sullen auch derselben Hůb ir gewer vnd furstand sein nach dem Lants recht. Na^omen si dar vber von der gewerschaft wegen mit recht indert dhainen schaden, wie derselbig schad genant wurde, den si oder irer erben ainer pei iren trewn am aide gesprechen mugen, denselben schaden sullen wir in aller sache genczleich vnd gar awsrichten ablegen vnd wider cheren an alle wider rede vnd sullen auch daz haben dacz vns vnd vnsern trewn vnd dar zu^e dacz aller vnser Hab vnd wir haben, wo wir die haben inner lants oder awzzer lants versu^echt vnd vnuersu^echt, vnd desselben schadens da von bechomen an chlag furbot vnd recht, so si na^echst mugen mit vns vnd vnser erben gu^etleichem willen vnd wort wir sein lembtig oder tod. Daz die rede furbas staet vnd vnuerchert beleib dar vber gib Jch obgenanter Wolfgang der freye im Hainreichen dem Chersperger vnd seinen erben den prief fu^er mich. vnd alle mein erben zu^e ainem waren vrchunde der warhait versigilt mit meinem anhangunden Jnsigil, vnd zu^e ainer gu^eten geczewgnu^esse mit dez erbern Otten dez Stadler anhangunden Jnsigil im an schaden. Geben nach Christi gepurde Drew czehen Hundert iar dar nach in dem Achtzgisten iar an dem Mantag nach sand Katrein tag.

Source Fulltext: OÖUB 9 (Wien 1906) S. 899-901