Innocentius Episcopus servus servorum Dei Dilectis filiis Cuonrado Lunaelacensi Abbati ejusque Fratribus tam praesentibus quam futuris regulariter substituendis in perpetuam memoriam. Desiderium, quod ad Religionis propositum et Animarum salutem pertinere monstratur, animo nos decet libenti concedere et petentium desideriis congruum impertiri suffragium. Eapropter dilecti in Domino filii vestris justis postulationibus clementer annuimus et Beati Michaelis Archangeli Monasterium, in quo divino mancipati estis obsequio, sub Beati Petri et nostra protectione suscipimus et prasentis scripti privilegio communimus statuentes, ut quascunque possessiones, quaecunque bona idem Monasterium in prasentiarum juste et canonice possidet aut in futurum concessione Pontificum, largitione Regum vel Principum, oblatione fidelium seu aliis justis modis Deo propitio poterit adipisci, firma vobis vestrisque successoribus et illibata permaneant. In quibus haec propriis duximus exprimenda vocabulis: Ecclesiam Mause, Ecclesiam Steinenkirchen, Ecclesiam Wisilburg, Ecclesiam Sconau, Ecclesiam Strasvvalchen, Ecclesiam Appadesdorf, Praedium, quod Cuonradus de Irembrechtingon et uxor ejus Mechtildis eidem Monasterio contulerunt videlicet Irembrechtingon et apud Tettingon Curiam unam et apud Rattueld mansum unum et apud Liugane mansum dimidium cum mancipiis ad ipsum praedium pertinentibus, Curtem, quam Engelmarus et soror ejus Benedicta apud Direneck vobis dederunt, . . . Fili Counrade Abbas apud Cremise emisti. Obeunte vero te nunc ejusdem loci Abbate vel tuorum quolibet Successorum nullus ibi qualibet surreptionis astutia vel violentia praeponatur, nisi quem Fratres communi vel sanioris partis consilio et assensu secundum Deum et beati Benedicti Regulam providerint eligendum. Decernimus ergo, ut nulli omnino hominum liceat praefatum Monasterium temere perturbare aut ejus possessiones auferre vel ablatas retinere aut aliquibus vexationibus fatigare sed omnia integra conserventur eorum, pro quorum gubernatione et sustentatione concessa sunt, usibus omnimodis profutura Salvo jure Diaecesani Episcopi Canonica reverentia. Si qua igitur in futurum Ecclesiastica secularisve persona hanc nostrae Constitutionis paginam sciens contra eam temere venire temptaverit, secundo tertiove conmonita si non satisfactione congrua emendaverit, potestatis honorisque sui dignitate careat reamque se Divino Judicio existere de perpetrata inequitate cognoscat et a sacratissimo Corpore ac Sanguine Dei et Domini Redemptoris nostri Jesu Christi aliena fiat atque in extremo examine districtae ultioni subjaceat. Cunctis autem eidem loco justa servantibus sit Pax Domini nostri Jesu Christi, quatenus et hic fructum bonae actionis percipiant et apud districtum Judicem praemia aeternae pacis inveniant. Amen. Amen. Amen. noster [Monogramm] Ego Innocentius Catholicae Ecclesiae Episcopus. C. Ego Stephanus Praenestinus Episcopus C. Ego Otto Diaconus Cardinalis S. Georgii ad Velum aureum. Ego Octavianus Diaconus Cardinalis S. Nicholai in Carcere. C. Ego Thomas Presbyter Cardinalis tt. Vestinae. Datum Laterani per manus Gerardi sanctae Romanae Ecclesiae Presbyteri Cardinalis ac Bibliothecarii VI. Idus Decembris Indictione VI, Incarnationis Dominicae Anno 1142. Pontificatus vero Domini Innocentii II. Papae anno 13.

Source Fulltext: OÖUB 2 (Wien 1856) S. 200-201