Wir Chunrat von gots genaden probst ze Ranshoven vnd ich Ludweig der grans hawptman ze vttendorf chund wellen sein allen den, di disen brief sehent oder vernement sind, daz chunrat von ach geworfen hat an ha^ertneiden den sa^ezpechen, daz er di hueb ze dancholfing, di er ze lehen hat gehabt von dem gotshaws ze Ma^ennse, auf hat geben hern diethart dem Erbern abbt ze Ma^ennse vnd chunrat der acher vnd seine chind von jm ha ent empfangen also, daz der sazpech ha^ertneid die hueb nyessen vnd haben sol vntz an seinen tod. nach hartneids des sazpechen tod sol sy haben chunrat von ach vnd seine chind ze rechtem lehen von dem gotshaws ze Ma^ennse. ob iemant auf di hueb chlagen wolt, so sol Chunrat der acher vnd seine chind oder wer sey jnnhat, versprechen alz recht ist, daz daz gotshaws ze Ma^ennse dez an allen schaden schol weleiben. waz schaden davon mocht geschehen mit dem recht, der schol chunraden oder seinen chinden oder wer die hueb jnn hiet, angeuallen vnd nicht daz gotshaws ze Ma^ennse. vnd daz daz also geworfen sey, dez geben wir disen brief nach chunratz dez acher vnd seiner chind pet, der jn an vns also gewarfen habent zu^e einem vrchund versigelten mit vnsern insigeln vnd sind darvber auch zewgen her chunrat der Richter ze Vttendorf, chunrat der Eminger, albrecht der hu^eber, Ott der pecher, Ott der chelner, der Tummaier, h. von Talgaw, chunrat der vogla^er, Chunrat glang, Ru^ether vor dem tor, chunrat Schorkel, chunrat der chamerer, chunrat der schreiber vnd ander frum lawt, di dapey sind gewesen, do ez geschach, do waz von Christi gepurd Tausent Jar drew hundert Jar, an sand Nyclas Tag.

Source Fulltext: OÖUB 4 (Wien 1867) Nr. 383, S. 356-357