Universis sancte matris ecclesie filiis, ad quos presentes littere peruenerint, nos miseracione diuina frater Ysenhardus patriarcha Anthiocie, frater Rostanus archiepiscopus Nenopatensis, Berengarius episcopus Carpentracensis, frater Andreas episcopus Croensis, frater Bartholomeus episcopus Cernicensis, frater Johannes episcopus Retrecensis, frater Guilhermus episcopus Cunauiensis, frater Jacobus episcopus Cabonensis, frater Egidius episcopus Adnopolensis, frater Petrus episcopus Achilonensis salutem in domino sempiternam. Splendor paterne glorie, qui sua mundum in effabili illuminat claritate, pia uota fidelium in sua clementissima maiestate sperancium tunc precipue benigno fauore prosequitur, dum ipsorum deuota humilitas sanctorum suorum meritis et precibus adiuuatur. Cupientes igitur, ut monasterium sancti Michaelis in Mense et ecclesia sancti Wolgangi (sic) patauiensis diocesis congruis honoribus frequentetur et a Christi fidelibus iugiter ueneretur, Omnibus uere penitententibus (sic) et confessis, qui ipsum monasterium ac ecclesiam in die sancti Michaelis et Wolfgangi in quolibet festo eiusdem monasterii et ecclesie in dedicacione monasterii, ecclesie necnon festiuitatibus infrascriptis videlicet natiuitatis domini nostri Jhesu Christi, circumcisionis, epiphanie, palmarum, parasceues, resurreccionis, ascensionis, penthecostes, omnibus diebus dominicis ac gloriose uirginis Marie, omnibus et singulis beatorum Petri et Pauli ac aliorum omnium apostolorum et ewangelistarum, inuencionis et exaltacionis sancte crucis, Johannis Baptiste, sanctorum Martini, Nicholai, Benedicti, Blasii, Georgii et Laurencii, beatorum Katherine, Agnetis, Barbare, Lucie, Margarete, Elisabet, in commemoracione omnium sanctorum et per predictarum festiuitatum octauas causa deuocionis, peregrinacionis et oracionis accesserint et qui nomen Christi audientes in diuinis nominari obsequiis in dicto monasterio et ecclesia se inclinauerint reuerenter ac in eleuacione corporis Christi in missis abbatis ipsius monasterii debite flexis genibus adorauerint, aut qui in serotina pulsacione campane ter salutacionem angelicam deuote dixerint, aut qui ad monasterium et alia ipsius monasterii et ecclesie necessaria manus suas porrexerint adiutrices vel qui in extremis laborantes dicti monasterii (sic) ac ecclesie quidquam suarum legauerint facultatum, nos de omnipotentis dei misericordia et beatorum Petri ac Pauli apostolorum auctoritate confisi singuli nostrum singulas dierum quadragenas de iniunctis eis penitenciis in domino relaxamus, dummodo diocesani voluntas ad id accesserit et consensus. In cuius rei testimonium presentes litteras sigillorum nostrorum iussimus appensione muniri. Datum Auinionis anno natiuitatis domini millesimo trecentesimo septimo decimo, pontificatus sanctissimi patris et domini domini Johannis pape XXII. anno secundo.||
Nos quoque Albertus dei gracia patauiensis episcopus dictas indulgencias quoad quadraginta dies, sicut a g ... ali premittitur, ratas habemus et gratas ac presentis scripti patrocinio cum appensione nostri sigilli duximus confirmandas. Datum Patauie anno domini M°.CCC°.XXIIII. XV°. Kalend. Maii.

Source Fulltext: OÖUB 5 (Wien 1868) Nr. XXXIX (Anhang) S. 631-632