Wier Christan von Gotez genaden abt vnd der Conuent dez gotezhauzzes ze Männse veriechen vnd tu^enn chu^ent an disem prief allen den, die in sechent oder lesen hörent, daz der Ersam herr her Christan der Druchsa^etzze von Lengbach mit wol verdachtem mu^et vnd mit gu^etem willen vnd gunst aller seiner Eriben gestifftt hat Got vnd vnser frawen ze lob vnd ze dienst vnd dem gu^etem sand Michel vnd allen Gotez Hailigen ze eren vnd iem vnd allen seinen vodern zu^e einem Selgra^et ein Ebigewe Mezze in dem Gotzhaus datz Stainchirichen, daz wier leichen, auf einem altar, den er iem dar zu^e erwellt hat vnd den er auch gewidemt hat mit Acht phunt phenning geltez wienner Mu^enzze, vnd schol die Mezze ta^eglich gehabt werden an vnderlaz auf dem altar, iz vnderuar oder ierr dann êhaft noˆt, dez selben schol man dann geinnern dem Pu^ergkrafen datz Ernekk oder swer der ist, der daz Haus dann inne hat. wa^er auer daz, daz die Mezze gesaumt von vnbesichtichait vnd von vnpilleichen sachen wu^ert, so schol der pharrer oder sein Geselle, von swelichem die saumung vnpilleich geschiecht, allcz lang an Mezze sein, vncz daz die Saumnu^ezze eruollt werd auf dem vorgenantem altar, alls offt vnd daz geschiecht. Vnd war auch daz, daz der vorgenant herr her Christan oder sein haussfrawe oder swer dez hauzze herre ist dacz Ernekk, mit haus da wa^eren, so schol die Mezze Ta^egleich auf dem haus gehabt vnd begangen werden, ob er wil, vnd schol daz geschehen auer in allem dem Recht, alz vor verschriben ist. wa^er auer daz, daz er wan seinen pu^erkrafen auf dem vorgenantem haus hiet vnd daz er oder swer dez hausse herre ist, selber do nicht wa^er mit haus, so schol man in der Chappelle, die er gestifftt hatt in dem vorgenanten haus, zwen Tag in der wochen Mezze haben, wenn daz der Pfarrer stat mag gehaben. Jz schol auch dar vmb der voder Gotez dienst, der in dem Gotzhaus ze Stainchirichen emaln gewesen ist, nicht geminnert noch gesa^eumt werden, den schol man dannocht haben also sitleich vnd gewo^enleich ist gewesen. Man schol auch wizzen, daz wier vnd auch vnser Gotzhaus der vorgenanten handelung vnd swie getan saumung von dem, der pfarrer ze Stainchirichen ist, an dem Gotzdienst, den der vorgenant herre gestifftt hat, gescha^ech, allenthalben an allen vnsern sachen vnengolten schu^ellen sein vnd an allen schaden beleiben. Vnd durich die Lieb, die der vorgenant herre zv vns vnd zu vnserm Gotzhaus hat vnd wier zu iern, haben wier zu der sa^elicheit, die er iem vnd sein vodern gemochtt hat mit der Ewigen Mezze ze haben in dem vorgenantem Gotzhaus ze Stainchirichen, vnsern willen gern gegeben. Dar zu zu einem v^erchu^end vnd zu^e ainer sicherhait, daz dem vorgenantem herren hern Christann iem vnd seiner afterchu^enft die vorgenant gu^etta^et, die er iem vnd sein vodern aufgetan hat, nicht abgenummen werd noch chain saumung an der Mezze, die er geewigt hat, nicht gescheh an alz vil vnd oben auz genu^emmen ist, geben wier diesen prief behangen mit vnsern Insigeln vnd mit dez Ersamen mannez Insigel hern vlrich dez pfarrer ze Stainchirichen, pei dez Zeiten iz geschehen ist. Die vorgenant sache hat sich ergangen, do man zalt von Christez pu^erd dreutzechenhundert iar, dar nach in dem Dreizzigisten iar an sand Johanns Tag Gotez Tauffer ze Su^ennwenten.

Source Fulltext: OÖUB 5 (Wien 1868) Nr. 580, S. 581-582