Wir Ott von Gottes genaden Pfallentzgraf ze Rein, Hertzog in Bayrn viechen offenbar an diesem Brief, das Wir mit guten Willen vnd wolbedachten Muth nach allem Vnsers Rathes Rath vnd Weisung durch Vnser, Vnsers Bruders Hertzog Heinrich vnd Vnsers lieben Vettern Hertzog Heinrich, Vnser Haussfrauen vnd aller Vnser vordern vnd Nachkhomen hail vnd seld dem Ersamen Abt vnd Convent des Gottshauses ze Maensee, die ietzundt da sindt oder fu^erbass dahin khoment, die genade haben gethan, das Wir ihn gefreyet haben vnd freyen auch mit diesem Brief auf Wasser vnd auf Landen alle deu khost, di man ihn fihret durch Vnser Land, der sie bedirffen ze ihr Notdurfft in ihr Hauss, es sey an getraydt, an wein oder an swelcher anderlay khost es sey also, das sie in derselb khost alle u^eberall in Vnsern Landen fu^erbass Ewiglichen fürgeen an allen Vnsern Mautstetten vnd Zollstetten frey vnd ledig ohn allen Zohl vnd Maut vnd an alle Vorderung, Davon wollen Wir vnd gebieten allen Vnsern Mautnern vnd Zollnern, die ietzund seindt oder firbass werdent, vestiglichen bey Vnsern Hulden, das si dem oben genanten Gottshauss, dem Abbt vnde dem Convent daselben dero vorgenanten Genadt statt haben vnd mit khainen sachen nicht u^eberfaren, irren noch bekhrenkhen, als sie Vnser grosse vnd schwa^ere Vngenade darumb wollen vermeiden. Wir nemen auch deroselben khost des vorgenanten Gotthauses, als oben ist verschriben, in Vnsern besundern schirm vnd gelaitt, swann Zeit man deu fürt durch Vnser Lant, da von wollen Wir vnd gebieten auch allen Vnsern Amptleuten, allen Vnsern Edlnleuthen vnd gemainleich allen den, die in Vnsern Land gesezzen sind, bey Vnsern hulden, das sie das vorgenant Gotthauss, seine Dienern vnd seine Botten, die denselben khost fu^eerent mit ichten laidigen noch beschwa^eren, sunder wöllen Wir, das sie dieselben durch Vnser fu^erderung willen von Vnser wegen vnd in Vnsern Namen fu^erdern vnd schirmen an aller statt, wo sie des bedu^erften. Vnd darüber ze Vrkhund geben wir ihn disen Brief mit Vnsern Insigel versigelten, der ist gegeben, da von Christus geburth waren Dreyzehenhundert Jahr, darnach in dem Drey vnd dreyzigsten Jahr an dem Sontag nach dem Auffartag.

Source Fulltext: OÖUB 6 (Wien 1872) Nr. 85, S. 94f.