Wir hainreich, Ott vnd hainreich von gotz genaden pfallencz Grafen ze Reyn vnd herczogen in Bayern veriehen offenbar an dem brief vnd tuen chund allen den, die in sehent oder horent lesen, daz wir durch hail vnd Sa^elde vnser vnd vnser voruodern dem Gotshaus ze Männse dem Abbt vnd den herren, di yecz da sind oder furbaz dahin chomment, dew genad getan haben, waz man in von Chost, Traid, wein oder anderlay Chost fu^er in ir chloster, dez sy wedurffen zu ir selbers munden vnd selber wellen verzeren, daz diselb Chost furbaz ewichleichen fu^erge vberal in vnserm land an allen vnsern zolsteten vnd Mawtstetten frey an allen zol vnd Mawt vnd davon welln wir vnd gebieten allen vnsern Mawttern vnd zolna^ern, di yecz sind oder furbaz werdent, daz sy dem vor genanten Gotshaus vnd den herren daselbs di oben genanten genad sta^et haben vnd mit nichte vberuaren, alz si darvmb vnser grossen vngenad wellen vermeiden, vnd darv^eber ze vrkund gebn wir jn den brief versigelten mit vnsern Insigeln, der ist geben ze purchawsen, do man zalt von christi gepurd drewzehen hundert Jar, darnach in dem dreizzigisten Jar an dem Suntag nach der zwelfboten tag sand peters vnd sand pauls.

Source Fulltext: OÖUB 5 (Wien 1868) Nr. 582, S. 583