Wir Christan von goz gnaden Abbt zu Ma^ennsee vnd der Conuent daselbs verjehen offenbar an disem brief allen den, di in ansehent, horent oder lesent, das wir Otten von dierenperg vnd seiner hawsfrawn Margreten vnd seinen erben vnd aller irer affterchunft haben verlihen das erb halbs auf dem guet dacz dierenperg, das otten anerbt von vater vnd von mueter, das sy das sullen jnne haben vnd sullen vns davon dienn, als es von alter gewonhait herkomen ist, welherlay das seyn vnd haben auch das gesehen an iren alten hanntvesten, das wir es durch recht leihen sullen. Es ist auch ze merkchen, ob ott von dierenperg anderer hab icht chaufft oder mer gewunn, da sol sein hawsvraw Margret vnd ir paider erben als gut recht zu haben, als vor vnd hernach verschriben steet. Es ist auch ze wissen vmb das chind diemuten, das er gehabt hat pey der ersten frawen frawn Alhaiten, mit Otten hab vnd seiner hawsfrawn Margretn vnd ir paider erben fürbas nichcz mer ze schaffen hat, vnd ist auch geuertigt mit varender hab. Vnd dasselb chind diemut hat vns aufgeben seinew recht mit guetem willen an aller hab Otten von dierenperg vnd seiner hawsfraw Margreten noch dhainn tail noch dhain ansprach dahin nicht mer hat, is noch dhain sein afftenchunft. Wir verjehen auch, das wir im verlihen haben den zehent halben auf dem hof ze Wangach hie dishalb der ach vnd das sechstail des :zehent daselb, das Ott von dierenperg vnd sein hawsvraw Margret geworben habent von frawn Gedrawten vnd von iren erben von dierenperg vnb habent vns auch dasselb sextail vor vns aufgeben, das das sta^et vnd vnzerbrochen beleib, geben wir in disen brief behangen mit vnserm Insigl vnd mit des Conuencz Insigel daselb. Das ist geschehen nach christi gepurd drewczehen hundert Jar vnd darnach in dem zway vnd vierczkisten jar an sand valteins tag. Der sach sind zewg Ruether der Ammon, hainrich von Chasten, Chunrat von went, hainrich von went, Chunrat Pachmair, hainrich an der mül, Chunrat der mair im mos, Albrecht von gries.

Source Fulltext: OÖUB 6 (Wien 1872) Nr. 400, S. 402f.