Ich Stephan von Chremms und mein hausfrau Margret veriehen offenbar an disem brief alle den, di (in) an sehent oder horent lesen, daz wir bestanten haben von dem ersamen herren apt Christann von Mennse und von dem convent da selb den hof datz sand Michel und di weyngerten, di zu dem hof geho^erent an daz tayllant und an den Limpperig, da schol man mir zu geben alle jar jaerichleich funftzik phunt phenning, ochtzehen phunt auf di plumo^estern, tzwelif phunt an dem auffartag, tzwayntzik phunt zu^e dem weynlesen, und umb di vor genanten Funftzik phunt schol ich dem oft genanten herren apt Christann von Mennse und dem convent da selb all ir weynn antwurten an dem wazzer mit lesen und mit allen sachen an all ir mûe und swo mein herr tzwen phenning hin legkt ze paue an den hof, da schol ich alle weg den dritten dar legen und swann mir mein herr zimmer geyt oder sentt, daz schol ich an zimmern an all sein müe. Daz die sach paydenthalb staet beleib, gib ich Stephan von Chrems dem ersamen apt Christann von Mennse und dem convent da selb disen brief versygelt mit meinem jnsygel. Daz ist geschehen, do man zahlt von Christes gepurde dreutzenhundert jar dar nach in dem tzwayundviertzigistem jar an sand Andres abent.

Source Fulltext: OÖUB 6 (Wien 1872) Nr. 89 (Anhang) S. 645f.