Ich Friedreich der A^lsterl, Gedrawt mein hausfraw vnd all vnser erben veriehen offenleich mit dem brief vnd tuen kund allen den, di in sehent oder ho^ernt lesen, daz wir daz leibgeding, daz wir gehabt haben auf dem hof ze Jernprechting vnd auf dem zehent dez selben hofs von dem gotshaws ze Ma^ennse vnd von dem conuent daselbs, haben aufgeben mit verdachtem muet ledichleichen Hainreich dem A^elsterlein vnserm sun mit den rechten, vnd wir ez jnn gehabt haben also, wann er nymer sey, daz dann der vorgenant hof mit sampt dem zehent dem e genanten gotshaws vnd dem conuent ledig, los vnd frey sey vor aller ansprach. er sol auch die weil, vnd er lebt, aller ja^erleich von dem hof vnd von dem zehent ze dienst geben ein halbs pfunt pfenning auf sand Michelstag, di dann gib vnd gaeb sein, in vierczehen tagen vor oder nach an geua^er. Wann er dez nicht enta^et, so hieten sich dem gotshaws alle seine recht veruallen. Wir versprechen auch dem offtgenanten gotshaws ze Ma^ennse vnd dem conuent mit vnsern trewen vnd mit dem gegenburtigen brief vmb die hantuest, die wir gehabt haben v^eber daz egenant leibgeding ze Jernprechting, die an geua^er verlorn ist, ob die furbaz funden wurd oder jnndert fu^er cha^em, daz die ein tote hantuest ist vnd fur baz chain chraft mer hat also, daz sy dem gotshaws noch dem conuent furbaz chainen schaden pringen mag noch sol ewichleichen. vnd daru^eber ze vrchund geben wir in den brief versigelten mit hern Hainreich dez Granns anhangundem insigel, der diser sach redner vnd taidinger gewesen ist, verpinden auch vns darvnder bei vnsern trewen allez daz sta^et ze halten, daz oben an dem brief verschriben ist, der geben ist nach Christ gepurd tausent jar, drewhundert jar vnd in dem acht vnd vierczigstem jar an sand Elspeten tag.

Source Fulltext: OÖUB 7 (Wien 1876) Nr. 82, S. 81f.