Ich Margret dew Schempurgerin vnd ich Andre vnd ich Wernhart ir su^en veriehen fu^er vns vnd fu^er vnser erben offenleich mit dem brief vnd tuen chund allen den, die in sehent oder ho^ernt lesen, daz wir mit vnserm genadigen herren abbt Hainreichen vnd mit dem conuent dez gotshaws ze Ma^ennse nach vnser pesten frewnt rat vnd gunst frewntleich verricht sein vmb allen schaden, den wir von prancz wegen oder wie er genant ist, von dezselben gotshaws wegen enpfangen haben also, daz wir ze einer ergeczung den zehent auf dem hof ze Schempurg, den wir von jnn jnnhaben ze pawmans recht vnd auf dem gu^etlein ze Taling, daz wir auch selb mit dem pflu^eg pawen, dienst vnd zehent jnnhaben sullen vnd nyessen, di weil ich vor genante Margret, mein su^en Wernhart vnd mein tochter Katrey leben, welcher der dreyer leib nicht ist, so hat ys yeder ander, der dann lebet an allew irrung, vnd wenn die vor genanten leib all drey nicht mer sind, so sullen die egenanten nw^ecz vnd recht dem vor genanten gotshaws ledig vnd loz sein von jn, iren erben vnd von allen iren frewnten an alle ansprach vnd chrieg. daz ys also sta^et vnd vnzebrochen beleib, geben wir jn darvber ze einer vrchund den brief vnder hern Pilgreims von Rotaw insigel vnd vnter Hainreichs des Tobelhaimer zu^e den zeiten purkraf ze Scharding insigel versigelten, jn peden vnd iren erben an schaden, darvnder verpinden wir vns mit vnsern trewen allez daz sta^et ze haben, daz an dem ist verschriben, vnd geben ist nach Christi gepurd vber drewczehen hundert jar vnd in dem ain vnd funfczigisten jar an aller heiligen tag.

Source Fulltext: OÖUB 7 (Wien 1876) Nr. 262, S. 267f.