Ich Fridreich der Tobel mein hausfraw vnd all vnser erben veriehen offenbar an dem brief allen den die in sehent ho^ernt oder lesent, daz wir vns mit vnserm genadigen herren abbt Hainreichen ze Ma^ennse vnd mit seinem conuent gu^etleichen verricht haben vmb den chrieg vnd ansprach di wir zu jn haben gehabt von des gu^etleins wegen ze Taling, vnd darvmb habent sy vns daz vorgenant gu^etl lazzen xvj iar vnd sullen wir ez di ersten vier jar jnn haben an dienst, di andern xij jar sullen wir ez dienen, Wir sullen auch di xvj jar all jar jn ir stift chomen vnd stift geben alz gewondleich ist. Vnd ob wir da nicht wolten oder mo^echten gesein, so sullen wir sey vnsern vorgenanten herrn abbt Hainreich ze Mannse vnd seinem conuent vnsrew recht di wir auf dem vorgenanten gu^etlein ze Taling haben, di genanten jar anpieten vnd geben nach zwair mann rat. Ob sy ir nicht wolten so sullen wir sy einem trewen pawman ze chauffen geben da sullen sy vns nicht an engen. Sich hebent auch vnsrew jar an wann wir darauf varen. Wir veriehen auch, ob wir jn di sach jndert v^eberfu^eren, so sullen wir pru^echig sein an vnsern eren vnd an vnsern trewen vnd sol man vns zureden alz man ze recht zu pru^echigen la^ewten reden schol vnd wesunderleich di drei her Rueger auf dem Perg ze den zeiten purkraf ze Wernstain her Pernhart der Talhaimer Wilhalm der Waczsmanstorfer di der sach taidinger sind gewesen vnd ander erber lawt. Daz jn daz sta^et vnd vnuerchert beleib geben wir jn den brief versigelten mit dez vor genanten herren insigel hern Ruegers auf dem Perg, der ez daran gelegt hat durch vnser pet willen jm vnd seinen erben an schaden. Der prief ist geben do man zalt nach Christi gepurd drewczehen hundert jar darnach jn dem siben vnd funfczigistem jar an sand Pauls tag ze der cherung.

Source Fulltext: OÖUB 7 (Wien 1876) Nr. 476, S. 483f.