Wir Hainreich von Gots genaden abbt ze Ma^ennsee veriehen offenleich mit disem brief vnd tuen kund allen den di in sehent oder ho^ernt, daz Stepfan datz Chemnaten hat gechauft daz guet dacz Chemnaten daz da vnserm gotshaus dient recht vnd red-leich jm vnd allen seinen erben von Ha^ertneiten dem Reuthaimer vnd von allen seinen erben, vnd haben wir in den chauf westa^et mit vnser hant, vnd sind dez chaufs redner vnd taidinger gewesen Ott der Ho^ehenuelder Heinrich der Freyer pfleger zu den zeiten ze Wildenekk vnd Fridreich der Lo^ener vnd Lipp dacz Oberwang vnd ander erber lawt genueg di ern werd sind, daz sich der chauf vnd di taiding also ergangen haben mit dez egenanten Ha^ertneitz dez Reuthaimer vnd seiner erben guetleich willen vnd mit wol verdachtem muet, daz bezewg vnd wa^ern wir mit disem brief versigelten mit vnserm anhangendem insigel vns vnd vnserm gotshaus an schaden. Der brief ist geben do man zalt von Christi gepurd dreutzehen hundert iar darnach jn dem siben vnd funfczigistem iar dez nachsten freitags nach dem auffertt tag.

Source Fulltext: OÖUB 7 (Wien 1876) Nr. 500, S. 508f.