Ich Weygchart der Huernein und Seyfrid mein prueder und ich Atakcher der Wolfstain und all unser erben wier veriechen unverschaidenleich und tuen chu^ent offenwar mit dem brief alle den deu in sechent und ho^erent lesen deu nu lebent und hernach chuftig (sic) sint, daz wier ain ansprach gehabt haben hincz dem erbern gestleichen (sic) herren apt Haeinreichen deuweil ze Mense und hincz seim covent hincz seim goczhaus da selbs ze Mense, daz vnserm vetern Weygcharten dem Huernein der oren (orden?) und deu phfru^ent in dem selben chloster ze Mense redleich und recht geben ward; der selben ansprach hab wier uns mit wolpedachtem muet liebleich und vreuntleichen mit ainander verricht und gebert, daz wier noch all unser erben fuerwas um deu sach gegen dem egenanten gestleichen herren apt Heinreichen ze Mense noch hincz allen sein nachchomen und hincz seim goczhaus da selbs nimmermerr chain ansprach gehaben schullen noch mu^egen chlain noch groz weder mit recht noch an recht weder mit warten noch mit werichen an als gever also weschaidenleich, daz uns der oftgenant herr apt Heinreich ze Mense gelobt und verhaissen hat inzenemen in daz vorgenant chloster unsern vetern Go^eriglein den Werder an unsers vetern stat Weygchartes dez Huernein unverzogenleich als wier eu dez getrau^en. War aver daz der egenant gestleich herr apt Heinreich oder sein nachchomen oder sein goczhaus von uns oder von unsern erben um deu sach fu^erwas icht ansprach gebu^en und swaz dez seu schaden nemen seu oder ier goczhaus mit nachreiten oder mit recht oder was seu schadens do von nemen er waer chlain oder groz den seu gesprechen mugen pey irren treun, den selben schaden schulle wir in ablegen und auzrichten gantz und gar an all widerred und an ieren schaden, daz schullen seu haben auf uns unverschaidenleich und auf alle der hab deu wir haben jn dem lant ze o^esterreich wier sein lembtig oder tod an als gever, daz lub wier all staet ze haben mit unsern treun was an dem brief geschriben stet. Darum geb wier in und ierem goczhaus ich vorgenanter Weychart der Huernein und Seyfrid mein prueder fu^er uns und fu^er alle unser erben den brief versygelt mit dez obgenanten Atakchers dez Wolfstain anhangunden jnsygel, darunder wier uns verpinten mit unsern treu^en allez daz stet ze haben waz an dem brief geschriben staet wan wier selber nicht aygens jnsygels haben und fu^er mich selber auch. Der sach sint zeug der erber herr her Nycla deu weil pharrer ze Stainechirschen (sic) und Ott der Vydorffer von Erlaff mit ierren anhangunden jnsygeln und ander erber laeut genueg den deu sach wol chunt ist. Der prief ist geben nach Christes gebu^erd dreuczehen hu^endert jar darnach in dem syben und fu^enfczigkisten jar dez nasten su^entages nach aller heyligen tag.

Source Fulltext: OÖUB 7 (Wien 1876) Nr. 524, S. 534f.