Bonifacius episcopus seruus seruorum Dei dilectis filiis abbati et conventui monasterii in Mannsee ordinis sancti Benedicti Patauiensis diocesis salutem et apostolicam benedictionem. Exposcit vestre devocionis sinceritas et religionis promeretur honestas, vt tam vos, quos speciali dilecione prosequimur, quam monasterium vestrum dignis honoribus attolamus. Hinc est, quod nos vestris in hac parte supplicacionibus inclinati, vt tu fili abbas et successores tui abbates dicti monasterii, qui pro tempore fuerint, mitra anulo et aliis pontificalibus insigniis libere possitis vti nec non, quod in dicto monasterio et prioratibus eidem monasterio subiectis ac parrochialibus et aliis ecclesiis ad uos communiter vel divisim pertinentibus, quamuis vobis pleno iure non subsint, benedictionem solemnem post missarum vesperorum et matutinarum solemnia dummodo in benedictione huiusmodi aliquis antistes uel apostolice sedis legatus praesens non fuerit, elargiri possitis, felicis recordationis Alexandri papae IIII praedecessoris nostri, que incipit Abbates, et aliis quibuscumque constitutionibus apostolicis in contrarium editis nequaquam obstantibus, nobis et eisdem successoribus auctoritate apostolica de speciali gratia tenore presencium indulgemus. Nulli ergo omnino hominum liceat hanc paginam nostre concessionis infringere uel ei ausu temerario contraire. Si quis autem hoc attemptare presumserit, indignacionem omnipotentis Dei et beatorum Petri et Pauli apostolorum eius se nouerit incursurum. Datum Rome apud sanctum Petrum XVII Kal. Aprilis Pontificatus nostri anno quarto.

Source Fulltext: OÖUB 11 (Wien 1868) S. 164