Frater Hainricus dei gracia Babenbergensis ecclesie Episcopus tenore presencium publice profitemur. Quod, quia Hospitale in Pirno monte Patauiensis dyocesis ad nos et Ecclesiam nostram in temporalibus pleno Jure pertinens ex negligenti et remissa prouisione circa ipsum et bona ipsius hactenus habita multipliciter est collapsum et collabitur incessanter et nisi celeri et salubri remedio succuratur eidem, non adiciet, vt resurgat. Nos, qui pro reformacione hospitalis eiusdem sollicitamur attente, procurationem et administrationem prefati hospitalis a discreto viro Heinrico Magistro quondam hospitalis memorati penitus reuocantes Ipsam prouido viro Gunthero plebano in Sancto Lienhardo Saltzpurgensis dyocesis nostro capellano dilecto, de cuius circumspectionis industria firmam spem gerimus, et quod per ipsius diligentiam operosam Idem Hospitale desideratis proficiat incrementis, commissimus et pro vite sue spacio committimus tenore presencium pleno jure Dantes sibi plenam et liberam potestatem fructus, obuencioues et Jura memorati Hospitalis colligendi, recipiendi, repetendi, distribuendi et generaliter omnia et singula faciendi, que pro vtilitate dicti Hospitalis sibi visa fuerint facienda, Testimonio presencium litterarum nostri sigilli robore munitarum. Datum in wolfsperch, Anno domini millesimo, Trecentesimo, vicesimo quinto, iij. Kalendas Julij.

Source Fulltext: OÖUB 5 (Wien 1868) S. 430, Nr. 431