Ich Ot der Rosenpletel purger ze steyer vnd mein Hauswrow Margret vnd vnser paider Erben Haimel Kathrei Christan Margret Jans Peter vergehen offenbar mit disem prief vnd tun chunt allen den di in sehent oder hoerent lesent, daz vns der Erber Herre Her Gunther Spitaler an dem Piern von seinen besundern gnaden die drev gut, di gelegen sint ze ass(?)ach in der pharr pay steyer zu vnsern leiben verlihen hat mit allen rechten vnd nutzen, als er seu vnd sein gotzhaus dacz Spital an den Piern hat ingehabt - eins daz da haist dez Hutter lehen, daz ander dacz dem Lechen an den czaun, daz dritte dacz Churen(?) an der leiten - also daz wier im vnd seinem gotzhaus zu dienst werden sullen swo wier mugen vnd auch pesunderleich jerchleich(?) im vnd seinem gotzhaus von den egenanten gutten dienen sullen an sand Goergen tag zwaynczich wiener phening. vnd swenn wier saumich weren an den vorgenanten dienst auf sand Goergen tag als e geschriben stet vnd dez niht geben, so sol der amptman dez egenantn gotzhaus mit vnserm gutleichen willen auf den oftgenanten gutten fur(?) den selben dienst phenten. Auch vergech wier, swen vnser der vorge^nanten(?) leib nimer ist, so sullen die vorschriben gut dem gotzhaus dacz Spital an dem Pirn hinwider gevallen an allen chrieg vnd widerred mit allen nutzen vnd rechten, di darczu gehoerent. Daz im vnd seinem gotzhaus daz stet vnd vnczebrochen peleib, dar vber gib ich in egenanten Ot mein offen prief versigelt mit meinem anhangentem Insigel zu einer vrchund der warhait. Der geben ist nach Christes gepurd drevczehenhundert jar darnach in dem sibenvndvierchisten jar an der zwelf Potten sand Philippen vnd sand Jacobs tag.