Wir Albrecht und Leupolt gebru^eder von Gotes gnaden herczogen ze O^esterreich ze Steyr ze Karnden und ze Krain herren auf der Windischen Mairich und ze Portenaw grafen ze Habspurg ze Tirol ze Phirt und ze Kyburg marichgrafen ze Burgow^e und lantgrafen in Elsazze verjehen bechennen und tůn chunt offenlich mit disem briefe, daz wier durch bette willen des hochwirdigen fu^ersten unsers lieben o^ehems hern Ludweiges byschofes ze Babenberg und durch wol verdiente gunst und gnade des erbern weisen unsers besunder lieben Dyetzen marschalichs der stift und des gotzhauses ze Babenberg zu wirden zu nucz und zu gemache dem erbern unserm getrewn andechtigen Gundelochen Marschalich des egenanten Dieczen brůder der jeczunt pharrer und spitaler ist des goczhauses und spitals an dem Pyern in Pazzower bystům bestettet haben wizzentlich und bestetten ouch mit disem briefe recht und redlich dem jeczgenanten Gu^endelochen zu dem egenanten seinem goczhause und spital an dem Pyern alle die freyhait recht genad und gute gewonheit die dasselb goczhaus und spital alle pharrer und spitaler daselbs von alter gehebt und herbracht habent von unsern vorvordern in aller der mazze, als daruber lauttent und weisent derselben unserer vorvordern hantfesten und briefe die nu zeleczt der hochgeborn fu^erst seliger gedechtnusse herczog Růdolfen von O^esterreich dem Got genade mit seinem briefe versigelt under seinem grozzen fu^erstlichen anhangenden insigel yetweder seit gepildet ernew^et und bestettet hat, wan wir gu^etlich und gerne gegunnet haben und gunnen dem egenanten spital und spitaler aller der freyhait und rechten gnaden und gůten gewonheitten die an demselben briefe begriffen sind an alles gever. Mit urchund dicz briefs versigelten mit unsern grozzen fu^erstlichen anhangenden insigeln. Geben ze Wienn an sand Agnesen tag nach Kristes gepurd dreuczehenhuudert jar darnach in dem acht und sechczigisten jar. D. d. in consilio magister curie Wolfgangus et Wehinger magister camere.

Source Fulltext: OÖUB 8 (Wien 1883) S. 358f., Nr. 366