ICH Reicher der Mu^elbanger mein hausfraw vraw Christein dez Pawmgartinger to^echter und all unser erben wir vergehen, daz uns unser genedigeu fraw vraw Anna die erwirdig a^epptessinne ze Trawnchirchen und ir convent da selbz von besundern gnaden und durch dienst ier und irem goczhawsz ze rechtem leybtgeding mir obgenanten Reychern dem Mu^elbanger und meiner egenanten hausfrawn vraw Christein uns ze payden leyben hat verlihen den hof ze Altmanning und ein lehen darselbz und waz darzu^e geho^ert an gever, gelegen in Rewthaymer pharr da wir jerleichen dem erwirdigen goczhawsz ze Trawnkirchen von raichen und ze dienst geben fu^enfczick wyenner phenning und nicht mer an unser vrawn tag ze der dienst zeit, und ein gut in der Gru^eb gelegen in Lo^echircher pharr und da von dyenen schu^ellen mit einem sinphert also man ez gereyten mag nach ainem peychtiger oder in die lantschran oder einer a^epptessinne hincz der weych, und wann wir den vorgenanten dienst und foderung versezzen auf den obgenanten gu^etern und nicht dyenechten ze rechten taegen, so hat mein vorgenant vraw und ir amptlaeut dar umb ze pfenten und ze no^etten alz auf andern dez goczhawsz gru^enten, und die obgenanten stück alz sie von alter hercho^emen sind. Und wann ich obgenanter Reicher der Mu^elbanger und mein hausfraw vraw Chrislein payde mit dem tod abgen und nimmer sein, so schu^ellen die obgenanten stu^eck alz sie oben benant sind mit allen ern rehten und nu^eczn ledichkleichen verfallen sein dem vorgenanten goczhawsz ze Trawnkirchen, daz wir und all unser erben hinfu^er ewichkleich nach unser payder tod dhayn ansprach noch vingerzayg dar nach haben noch gewinnen schu^ellen weder mit recht noch an recht. Und dar u^eber zu^e einem warn u^erchu^end geben wir der erwirdigen frawn frawn Annen der apptessinne ze Trawnkirchen und ierm convent daselbz den brief versygelten mit meins obgenanten Reychers dez Mu^elbanger anhangunden insygl, und zu einer pezzern sycherhayt und bezeugnu^ezz mit meinen lieben besu^endern freunten Eberharten dez Mu^elbanger di zeit richter ze Steyr meins lieben vetern und mit U^elreichen dez Aschperger die zeit purkgraf ze O^ertt und Hainreichs dez Talhaimer anhangunden insygln. Der brief ist geben do man zalt von Christi gepu^erde drewczehen hundert jar und dar nach in dem fu^emf und sybenczigisten jar an der heyligen junchkfrawn sand Katrein abent.

Source Fulltext: OÖUB 8 (Wien 1883) S. 788f., Nr. 762