Ich Hainrich von Potendorff unnd ich Chunegund sein haußfrawe, wir veriähen und thuen kundt allen den, die diesen brief sehend lesen^a oder hörend lesen, die nu lebend unnd hernach künfftig sind, daß wir mit unnser erben guetem willen unnd gunst unnd mit zeitigem rath annder unnserer freunde unnd mit gesambter hand verkhaufft haben alle unnser aigenschafft unnd alles unnser aigen, das wir haben gehabt da zu Paden zu holz, ze velde unnd ze dorff, gestifft oder ungestifft, versuecht oder unversuecht, wie es genannt ist, umb zwayhundert pfundt Wiener pfenning, der wir recht unnd redlich gewehrt sein, dem erbaren manne brueder Sighardte dem prior unnd der samnungen gemaine sant Augusteins ordens des hauses da zu Paden, lediglichen unnd freylichen ze haben unnd allen iren fromen damit ze schaffen, verkhauffen, versezen unnd geben, wem sie wollen ohne allen irresal. Darüber so haben wir, ich vorgenannter Hainrich und ich Chunegund sein haußfrawe, die capellen, die da leit¹ auf dem vorgenanntem aigen, das wir da ze Paden verkhaufft haben, geben nach geistlichem rechte lauterlichen durch Gott unnd durch unnser vordern seele und durch unnser seele willen auf das gottshauß der vorgenannten brüeder sant Augusteins ordens da zu Paden². Darüber so sezen wir unns, ich vorgenannter Hainrich von Potendorff unnd ich Hainrich unnd ich Rudolff seine söhne, unverschaiden dem vorgenannten^b gottshauß unnd den brüdern sannt Augusteins ordens da zu Paden umb das vorgenannt aigen da ze Paden zu rechtem scherm für alle ansprach nach landtsrechte unnd geben ihn darüber diesen brief zue ainem urkhunde unnd zu ainem gezeuge unnd zu ainer ewigen vestunge dieser sachen, versiegleten mit unnserm insigel unnd mit der erbaren herrn insigiln, die ihr insigil zue ainem gezeuge an diesen brief gehangen haben, und sind auch gezeugen: herr Leutholt von Chunring^c, schenckh in Österreich, herr Stephan von Meißawe, marschalckh in Österreich, herr Alber von Puechaim, truchsäße in Österreich, herr Albrecht der Stuchs von Trautmansdorff unnd herr Ulrich von Wolffgerstorff, die zu den zeiten landrichter waren in Österreich, herr Chunrad unnd herr Seybott meine brüeder von Potendorff, herr Lupoldt von Sachsengange unnd sein söhn herr Lupoldt³, herr Chalhoch von Eberstorff, herr Dietherich von Wolffgerstorff, herr Leutoldt von Chrebspach unnd seine söhne Hainrich, Friderich, Engeldiech unnd Leutold, herr Albrecht von Aleet^d, herr Haertwich von Ort, herr Ulrich der Schenche unnd sein prueder herr Marchart von Riedt, Chunrad unnd Nicla die prüeder von Valwa⁴, herr Otte von Paden, herr Wolffger von Rör⁵, Wulfinch der Rinderschinch, Haidenrich von Feichenstorf⁶ unnd anndere bidirbe leuth genueg, den diese sach wol kundt ist. Dieser brief ist geben in der Minner Brüder Hauß zu Wienne, des nähisten pfinztages nach den feirtagen in den ostern, do von Christus geburth waren ergangen tausent jahr, zwayhundert jahr, in dem sibenden unnd neunzigisten jahre.

Source Fulltext: MAURER, Augustiner-Eremiten Baden (=FRA II/89, Wien 1998) S. 63-65.