Ich Wernhart von Chreuspach vergich und tun chunt allen den, die disen brief lesent oder horent lesen, die nu lebent und hernach chunftig sint, daz ich und mein erben zu rechtem lehen gehabt haben und haben von dem erbern herren dem Apt von Mellich ainen zehenten auf aynem Weingarten, der da leit ze Paden under dem Taehenstayn^a und haizzet der Unbeschaiden, den ich verchauft han dem erbern gaistlichen manne pruder Chu^enraten, dem prior ze Paden augustiner ordens², und dem convent da selbens, alz seu dar uber meinen brief habent, also daz der selbe zehent in unsrer hant ewichlichen beleiben sol, den vorgenanten herren von den augustinern zu Paden an allen schaden, und schullen des fu^erbaz von mir und meinen erben und von allen meinen nahcho^emen aller dinge ledig und vrey sein. Daz wir dehain rede nach dehain voderung nach dehain ansprache gegen den selben herren ze Paden auf den selben Weingarten und auch umb den vorgenanten zehent mit dehainer laye sache nimmermer gehaben schullen, des verpinde ich mich und alle mein erben ze laisten mit unsern trewen und gibe dem vorgenanten pruder Chu^enraten, dem prior ze Paden, und dem convent da selbens und iren nahcho^emen disen brief ze ainem offen urchunde und ze ainer gantzen sicherhait, versigelten mit meinem insigel und mit der erbern herren insigeln meiner guten vreund hern Fridreichs von Chreuspach meines vettern³, herrn Otten des Haespekchen meines swagers und hern Gotfrydes von Wyldungesmawer, die diser sache gezeug sint mit iren insigeln. Diser brief ist geben ze Wienn nach Christes gepurt dreutzehen hundert iar, darnach in dem virtzigistem iar an sand Lamprechts tage.

Source Fulltext: MAURER, Augustiner-Eremiten Baden (=FRA II/89, Wien 1998) S. 139-140.