Ich Maischerl^a, jud von wälschen landen, gesessen in der Newenstatt, vergich für mich unnd für alle meine erben unnd thue kundt offentlich mit dem brief allen, den er fürkhombt, von wegen des geltbriefs, den ich hab von brueder Wolffgang Natinger, augustiner orden zu Baden, der da laut dreyzehen pfundt pfenning auf sanct Martins tag, alls im xlviiii^b jahr, des nun bey sechs jahren ist, darin zu pfandt stehen zween weingarthen, ain guet, der Huppler² genannt, in der riedt in Ziselein unnd dienet ain aimer perckhrecht unnd sechs pfenning den geistlichen herrn gen Maurbach, der annder gelegen am Pfaffstetterberg, genannt der Hepler³, unnd dienet vier aimer perckhrecht unnd vier unnd zwainzig pfenning den ehegenannten herrn, unnd ist besieglet mit des erbaren Hansen Wagnern, der zeit pergmaistern der ehegenannten geistlichen herrn insigel^c. Wan der ehegenannt brief nit vorhanden ist unnd hab den nicht gehaben mögen, damit ich hett den brief mögen antworthen dem ehegenannten brueder Wolffgangen - denselben brief hatt der ehegenannt brueder Wolffgang von mir erlöst umb äckhern unnd gesuech. Unnd ob das wer, daß derselb brief indert herfür khäme oder gezaigt wurde, daß der ab unnd todt sein soll unnd hinfür kein krafft mehr haben soll. Unnd sage auch ich, obgenannter Maischerl jud, für mich unnd meine erben den benannten brueder Wolffgang, seine erben unnd nachkhommen von des ehegenanten briefs unnd aller geltschulden wegen, nichts ausgenommen, ganz frey, quit, ledig unnd loß vor meniglich von datum des briefs. Were aber sach, daß ime der ehegenannt brief hinfür zu schaden khäm, wie sich das füget, viel oder wenig, haimblich oder offentlich, denselben schaden gelobe ich unnd meine erben dem ehegenannten brueder Wolffgangen abzutragen unnd widerzukheren ohn all sein mühe unnd schaden. Er soll auch unnd seine erben den schaden haben auff all dem, das wir haben, es sey erb oder fahrend guet, wie das genannt oder wo es gelegen ist, nichts ausgenommen, davon sie^d der landtsfürst oder sein anwaldt richten unnd gewehren soll, ohn clag, ohn fürbott unnd ohn alle anndere notaidung. Das ist unnser güetlicher will, wir sein lebendig oder todt. Mit urkhund des briefs, besiegelt mit der erbaren unnd weisen Geörgen Geißlhaimer⁴, der zeit statt- unnd judenrichter zue der Newenstatt, unnd Georgen des Kasstners⁵, burgers daselbsten, beeder anhangender insiegeln, die ich mit fleiß darumb erbetten hab, ihn unnd iren erben ohn schaden. Unnd zu wahrer sicherheit bestett ich die obergeschrifft mit meiner judischen handgeschrifft unnden, Geben zu der Neuwnstatt am mittichen, sanct Erhardtstag, nach Christi geburth vierzehenhundert jahr unnd darnach in dem fünf unnd fünfzigsten jahre⁶.

Source Fulltext: MAURER, Augustiner-Eremiten Baden (=FRA II/89, Wien 1998) S. 251-252.